ZALEN January 7, 2024: Mizoram pumah ration card 2,86,523 a awm mek a, thla tina Mizoramin buhfai a mamawh chu quintals 97,000 chuang a ni.

ZALEN-in Food, Civil Supplies & Consumer Affiars Department thawktute hnen atanga thu a dawn danin ration card awm mek 2,86,523 zingah hian card eng (AAY card) 25,796, card pawl (PHH card) 1,48,331 leh card var (Non-NFSA) 1,12,396 te an ni.

Chhinchhiah danin ration card-a hming chuang zawng zawng hi mi 11.67,757 an ni a, hengte hi AAY-ah mi 64,164, PHH-ah mi 6,32,374 leh Non-NFSA-ah mi 4,71,219 te an ni.

ZALEN zawhna chhangin FCS&CA thawktute chuan thla tin Mizoram chuan ration buhfai sem tur atan quintal 97,000 vel a mamawh tih an sawi a. Buhfai hi card eng leh card pawlte tan sawrkar laipui chuan thla tin quintal 59,478 a thlawnin a pe thin tih sawiin a bak thla tin buhfai leina senso atan Rs. vaibelchhe 19 vel an seng thin niin an sawi bawk.

FCS&CA minister-in card var-a ration la thinte buhfai man sawrkarin tumsak tawh loh a tum nia a sawi chungchang zawhna chhangin department lam chuan hemi chungchangah hian rawtna chi hrang hrang 10 vel sawrkarah an thehlut a. Thutlukna chu sawrkar thuneitu sang, cabinet thutlukna tur a nih thu an sawi bawk.