Aizawl; Social Welfare Department hnuaia scheme KSY leh RGSEAG-SABLA hnuaiah hmeichhe tleirawl, sawrkar atanga hamthatna dawng mi 41650 an awm mek a. Heng zinga 5265 hi KSY scheme hnuaia mi an niin dang 36385 hi RGSEAG-SABLA scheme hnuai ami te an ni. Social Welfare Department thawktute hnen atanga thudawn danin Kishori Shakti Yojana (KSY) hi hi a tirah chuan Mizoram district 5 Lawngtlai, Champhai, Kolasib, Serchhip leh Mamit a ICDS Project 15 ah kalpui a ni a, mahse kum 2010 atang khan sawrkar laipui chuan a aia huapzo zawk Rajiv Gandhi Scheme for Empowerment of Adolescent Gilrs (RGSEAG) -SABLA a kalpui tan tih an sawi. Social Welfare Department a Programme Officer PL Liandinga chuan he scheme in a tum ber chu tleirawlten ei leh in tha, hriselna tha leh mahni eizawnna tlak thiamthil an zirchhuah hi a ni, a ti a. Health, Education leh Labour & Employment department te nen tang tlangin tleirawlte chawikan/dawmkan nan hma an la ho thin tih a sawi bawk. Lunglei a awm mek Vanlalpianpuii, Programme Officer chuan tleirawlte chu ei leh in tha pek an nih bakah an hriselna te an endik thin tih sawiin hei mai bakah sawrkar office dawr dan te laphiar, puanthui, sam siam leh an tui zawng an zir theihna tur an ngaihtuah sak thin tih a sawi a. Heng an zirna zawng zawng pawh hi an tum sak vek tih sawiin tleirawl ten hmang tangkai lehzual se an duh tih ZALEN a hrilh bawk. Heng scheme pahnih te hi kum 2012 atangin Mizoram ah a taka kalpui tan an ni. Social Welfare Deptt. hian Integrated Child Development Scheme (ICDS) hnuaiah naupang kum 6 chin hnuailam ten ei tur tha an dawn theihnan leh hriselna tha an neih theihnan te, nu naupai ten tha taka fa an neih theihnan hma an la bawk a. Tunah hian ICDS Project 27 neiin Anganwadi 2244 a awm mek a ni.