Mizo tlangval, H.Lalmuanpuia chu Air India Express-ah commercial pilot turin a tling thar a, hna zawm turin a intintuah mek a. Ani nen hian Mizo pilot paruk an awm mek a ni.

Mission Vengthlanga H.Lalrosanga fapa, Muanpuia hian April, 2014 khan Govt. Aviation Training Institute, Bhubhaneswar, Odisha-ah thlawhna khalh zirna bul a tan a. Kum 2017 khan a zir chhuak.

Bhubhaneswar-a a zirnaah hian thlawhna leh instructor/examiner vel remchan loh a awm avangin flying club dang pahnih - Chimes Aviation Academy (Single Engine Checks/Exam), Bhopal, Madhya Pradesh leh Bombay Flying Club (Multi Engine Checks/Exam), Mumbai, Maharashtra-ah a chhunzawm bawk.

Air India Express thlawhna khalhtu ni tur hian a kawng a thui hle a. April 23 khan written exam a bei hmasa ber a, exam beitu mi 1,500 vel zinga mi 300 vel an tling a. May 15-a result a chhuah hnuah Advanced Compass Assessment & CPP Personality Profile nei lehin hei hi Oxford hnuaia CAE-ah tih a ni a. June 26 khan result chhuakin June 28-ah Group Discussion leh Personal Interview an nei zui a. Hemi result hi July 15 khan a chhuak.

Hemi hnuah pawh hian July 21 khan exam chhawng lina, Pre-Employment Medical Examination an nei leh a. July 26 khan offer letter leh a tling tih hriattirna tak tak, Letter of Intention (LoI) chu a dawng ta a ni.

Air India Express hnuaiah hian thawk dawn tih chiang tawh mah se thlawhna khalh tak tak turin training an la hmachhawn leh dawn a, training hi vawi khatah mi 20 vel tetea neih tur niin an koh hun nghakin a awm mek.

Kum 32 mi, Mission Vengthlang tlangval hian Air India Express pilot ni tura a dil rual hian April 30 khan Indigo Junior First Officer written exam beiin May 28-a result chhuakah a tling tih a hria a. August 7-8 chhunga exam dawt leh hmachhawn thei tur a ni a; mahse, hriattirna hi July 27 khan dawngin Air India Express zawm tura a lo tihfel vek tawh avangin a chhunzawm dawn ta lo niin ZALEN a hrilh.

Muanpuia nen hian Mizo zingah commercial pilot ni mek paruk an awm dawn ta a. Wushu avanga hriat hlawh thin, Patrick Paul Hauhnar fapate pahnih, Michael L. Hauhnar leh George L Hauhnar te chu captain an ni tawh a, Michael-a hi kum li lai captain a lo ni tawh nghe nghe a. Anni unau bakah hian mi dang pathum pilot dang an awm mek bawk.

MIZO AIRLINES PILOT THAWK MEKTE:

1. Captain Ramngaihzuala Khiangte
Company thawhna: Indigo Airlines (Former Indian Airlines Pilot)
Thlawhna khalh: Airbus A320 series
Veng: Venghlui, Aizawl

2. Captain Michael Lalrintluanga Hauhnar
Company thawhna: Air India express (Former JetAirways & Spicejet Pilot)
Thlawhna khalh: Boeing B737NG /Max/ Freighter
Veng: Tuikhuahtlang, Aizawl

3. Captain George Lalrinzuala Hauhnar
Company thawhna: Indigo Airlines
Thlawhna khalh: Airbus A320 series
Veng: Tuikhuahtlang, Aizawl
(George L Hauhnar hi Mizo zinga B.Sc Aviation Degree nei hmasa ber a ni.)

4. Senior Co-Pilot Michael Lallawmzuala
Company thawhna: Air India
Thlawhna khalh: Boeing B777
Veng: Ramhlun North, Aizawl

5. Junior First Officer VL Hriatpuia
Company thawhna: Indigo Airlines
Thlawhna khalh: Airbus A320 series
Veng: Zarkawt, Aizawl

6. Trainee First Officer: H Lalmuanpuia
Company thawhna: Air India Express
Thlawhna khalh: B737 series
Veng: Mission Vengthlang, Aizawl