Aizawl August 31, 2022 : Vawiin khan Home Commissioner/Secretary H. Lalengmawia kaihhruaiin a pisaah sawrkar official-te leh MJA General Headquarters hruaitute'n press identity card leh sticker hman sual chungchang sawihona an nei.

Sawihonaah hian MJA General Hqrs atangin President C. Lalrambuatsaiha hoin office bearer-te an tel a, sorkar official atangin DIG Lalhuliana Fanai, Aizawl DC Dr Lalhriatzuali Ralte, Home Additional Secretary Lalhriatpuia, IPR department Director C. Lalnunkima leh Deputy Director Mina Zoliani, Aizawl SP aiawh, Aizawl Traffic SP aiawhte an tel.

Thutkhawmah hian press mi nihna chungchanga dan leh kaihhruaina awmte sawi lan a ni a. Press mi ni lo, press mi anga inlantira press ID leh sticker hmang an awm tawh lohna turin a theih ang anga hmalak an rêl. Chutiang ti thinte chu ti tawh lo tura beisei an ni a, ti lui zel an awm a nih chuan dan hmanga action lâk thlenga bawhzui dan tur an sawiho bawk.

Press mi anga inlantira press ID leh sticker hmang sual an awm thin chungchanga Home department hotute leh sawrkar official dangte hmalaknaah MJA Gen. Hqrs chuan lawmthu a sawi a ni.