Aizawl: Aizawl North II bialtu MLA Dr. Vanlalthlana chuan Zirtawp zan khan a bial chhung veng hrang hranga NGO te chu White Stone Conference Hall, Ramhlun North-ah kokhawmin a bial chhung veng hrang hrang tana a tangkai thei ang bera MLA Fund hman dan tur a duan te Powerpoint presentation hmangin hrilhhriatna leh sawifiahna hun a nei.
Bialtu MLA chuan YMA, MUP, MHIP leh infiamna lama hmasawn tura vengchhunga club dinte chu veng thatna tura theih tawp chhuah thintu an nih avangin MLA Fund 20% chuang veng hrang hranga NGO ten hmasawnna hna an thawhna turin a dah tih a sawi a. MLA fund hi kum tin tlem tetea dawng lova a hlawma an dawn theihna turin a ruahman a, veng hrang hranga YMA, MUP, MHIP leh Sporting Club ten an dawn kum tur an pawt bawk a ni. Dr. Mathlana chuan veng chhung tana hmathlir thui tak nei chunga project tha tak siam turin NGO-te a ngen a, MLA Fund-in a daih loh pawhin State leh Central-a funding agencies-a project liantham dawng thei tura ruahmanna siampui leh bawhzui tura a inhuam thu a sawi bawk.
Dr. Mathlana chuan NGO tin ten a sum dawn tur a dahhran sa bakah, pool fund siamin, chu pool fund ami chu veng hmasawn nana project tha zual thlanchhuahte hnenah pek a nih tur thu a sawi bawk. Dr. Mathlana chuan Local Area Development Committee (Local Council member pathum, NGO leh Political party hrang hrang aiawh pahnih theuh telna) din a ngaihpawimawh thu a sawi a, he Committee-ah hian Bialtu MLA chu Chairman a nih dawn thu leh he committee hian vengchhung hmasawnna tur ruahmanna siam leh hna tha taka thawh a nih theih nana hnathawh endik hna a thawh tur thu a sawi.