Aizawl May 20, 2023 : Aizawl South III MNYF Block 2 leh Unit 26 te intawhkhawmna, Maubuang-a ‘Khawvelthanga Rûn’ a neiha hun hmanpuitu MNF thalai Vice President Zodinpuia chuan, MLA inthlanpui lo awm turah MNF el pha ber tur chu ruhrel lian leh nghet tak nei sa Congress party tho an ni dawn tih a sawi a, ZPM ten ram hruaitu hmasaten thil tha tih nei lo anga an sawi thin chu MPF pawhin tha a ti lo niin a sawi. 

Zodinpuia chuan MLA inthlanpui lo awm turah MNF el pha ber tur chu ruhrel lian leh nghet tak nei sa Congress party tho an ni dawn tih sawiin, "ZPM tan Mizoram ah sawrkar siamna kawng a la awm lo. Kum 2018 MLA inthan hnuhnung ber ah khan ZPM chuan bial 38 an chuh atangin bial paruk (6) ah MLA bial vawngtu an nei ve a, bial 13 ah vote hmuh tlem lutuk avangin dahkham an chawi vek thung. ZPM-in dahkham an chawina bial 13 ah hian kumin MLA inthlanpui lo awm turah dinchhuah ngaihna a la awm lo vek a ni," a ti. Aizawl khawpui chhunga MLA 5 an neih te pawh laksak leh turin MNF chuan uluk takin hmalakna a kalpui mek niin a sawi bawk.

MNYF Vice President chuan, "Mizoram chu India ram state naupang berte zinga mi ni mah ila, kawng tam takah India ram state dangte entawn kan ni tawh a. Kan hruaitu hmasate’n ram hmasawnna tura an hnathawhte hmuhsak duh lova ZPM-in mipuite an zirtir thin hi a pawi a, Mizoram People Forum (MPF) pawhin ngai pawimawhin; zirtirna diklo tiin a au chhuahpui tawh a ni," a ti.

Zodinpuia chuan, Mizoram mai ni lo; India rama political party upa ber pawl MNF hian Mizoram inthlanpui lo awm turah sawrkarna a siam chhunzawm leh ngei dawn a ni, a ti a. Mizoram political party hrang hrang zingah MNF aia hruaitu nei tha an awm lo tih sawiin, Congress, ZPM leh BJP hotu lu te chu hun rei tak MNF-a lo awm tawh, nihna leh chanvo thlâkhlelh avanga political party hrang hranga awm kual tawhte an ni, a ti. 

MNF Thalai Vice President chuan, Mizoram chu Pathian-in Zofate Jerusalem ni tura a din. Zohnahthlak rorelna pakhat hnuaia aawm leh theih nan hnama dintu chuan kawng a ruahmansak mêk a,. Zofate’n zalenna famkim an neih hma loh chuan MNF chu Mizo mipuite hruai tura Pathian pek a ni, a ti bawk.