Aizawl: East Tuipui bialtu MLA Ramthanmawia chuan ni 10.1.2023 (Thawhlehni)-a CNA hmunpui, Victoria Camp, Myanmar lama Doctor pana Vaphai mi 10 kalte, a hmuna an awm laia Myanmar Jet Fighter-in an bula bomb a thlak, thlabar taka himna zawnga Trench (khur) chhunga tlanchhia, vanneihthlak taka him taka Vaphai rawn thleng leh te tan ni 12.1.2023 (Ningani) khan an thla hualsakin, chawhlui a buatsaih sak. 

Thlahualna hun hi VC, YMA, MHIP leh Group MNF OB, Vaphai ten an hmanpui a. Bialtu MLA-in a ngaihna hria a, thlabar taka awmte tan thlahualna hun a buatsaih hi vanduaina tawktute leh VC, YMA, MHIP leh Group MNF chuan khawtlang aiawhin lawmthu an sawi. Ramthanmawia hian a bial fang zovin Aizawl a pan a, Aizawl a panna kawngah an chanchin hria-in ral atangin an thla hualna chawhlui hi a siam sak a ni.

Bialtu MLA chuan ziaka thuchah a siam chu thlahualna hunserhah hian chhiarchhuah a ni a. "Bial mite, Tiau kaia damna beiseia inentir tura kal leh tul dang pawimawha kal zawng zawng te, ngaihtuah phak baka hlauhawm leh thlabarawm thil in tawng hi pawi ka ti tak zet a. Hetih laia bial mipuite himdam taka khua in lut vek thei tih ka hriat-in ka lawm em em a ni," a ti.

MLA chuan January ni 4,2023 atanga bial fan programe a neih chhunzawm leh hnu-a Aizawl lam a pan kawngah an chanchin a lo hria tih sawiin an chanchin a ngaihven nghal a, himdam takin an awm vek tih a hriat khan a thawl huai tih a sawi. A ranglama an thlahual ngei ngaia a hriat thu sawiin VC te kaltlang tala an thlahual chu a tihturah a ngai a, an kiangah a awm reng a ni tih hriatsak turin a duh tih a tarlang bawk a ni.