Aizawl: Mizoram Legislative Assemble member 40 te chuan an hlawh atanga 1% chu mipuite hriselna atana hmalakna tur ‘health care’ atan an dah dawn.

Health care atana MLA-ten an hlawh 1% an dah tur thu hi Chief Minister Zoramthanga chuan Assembly session neih zawh taka budget a tlangkawmnaah a sawi a. “Health care atan hian nikum lama sum awm sa vaibelchhe 150 a awm bakah kumin budget-ah vbc 50 dang dah leh a ni a. MLA-te bakah hian sawrkar hnathawk leh mipuiten an dah bawk chuan health care-ah hian phurrit phur lova kal theih kan beisei a ni,” a ti.

Chief Minister chuan MIMER tia hming vuah, Zoram Medical College tia thlak chhan sawiin, “Prime Minister kal ta, HD Deve Gowda sum min pek hmangin bul kan tan a, sawrkar laipui thuneituten India rama hospital liante nen thawkho tura min rawn angin St.John’s Hospital nen thawkho a, an doctor thiamte nen inkalpawh turin ruahmanna kan siam a. Kan sawrkar a tlak hnuah sawrkar kaltain Medical College turin a ti a, a hautak avang leh sum hmuh ang angte kalna tur bik zel a awm avangin Burma, Manipur, Bangladesh leh hmun danga Mizo awmte pawm tlan theih ber tur nia kan hriat angin Zoram Medical College tiin hming kan vuah ta a ni,” a ti.

MLA-ten an hlawh atanga 1% health care-a dah an tum chungchangah Zalen zawhna chhangin Assembly Speaker Lalrinliana Sailo chuan, “Ka rin dan chuan MLA-ten sum an dah tur hi July, 2019 atangin ni turah ka ngai a, hetiang deuh hian sawrkar hnathawkte pawh hian ti ve thei se ka duh hle a ni,” a ti.

Speaker chuan health care atana MLA-ten 1% an dah tur chu GPC rel a ni tih sawiin, “General Purpose Committee (GPC)-ah hian Speaker kaihhruaina hnuaiah Chief Minister, Deputy Speaker, Assembly-a committee peng hrang hrang Chairman leh Opposition group leader te an tel a, GPC rorel hi chu an hnial ngai lem lo a ni,” a ti bawk. MLA-ten thla khata health care atana an thawh tlingkhawm tur zat chungchangah Speaker chuan Minister leh MLA te hlawh zat a inan loh avangin a zat chiah sawi fak a harsat thu Zalen a hrilh a ni.