Aizawl 21.06.2024 : Zirtawpni hian MNF chuan Mizo Hnam Run-ah Chhung inkhawm neih a ni a, Lalrinenga Sailo, AMC Mayor leh MNF Adviser ni bawk chuan thusawiin, AMC Ward No XIX By-Election lo awm tur atan hian MNF an chak ngei dawna an rin avangin ZPM in an huphurh lawk hle a ni, a ti.

Lalrinenga Sailo chuan, AMC Ward No XIX By-Election-a MNF Candidate Dr Lalrinzuali Hrahsel hi campaign a feh chhuah tawhnaah mipuite pawn an ngainat rawn hle a. Campaign tawhnaah mipui-ah an boruak pawh a tha hle niin a sawi a. Tluang takin an bei zel anga, an Candidate chungah rinna sang tak ward mipuiten an neih belh zel a beisei thu sawiin, chakna chan ngei a beisei thu a sawi bawk.

AMC Mayor chuan, "Khawvel hi a changkang chho zel a, Technology-ah kan sang chho tawlh tawlh a, social Media in min chenchilhin tun hmaa chanchinbu hmanga thuthar kan hriat thin aia chakin Social Media-in min lo awp bet ta a. Social Media hi mipuite pawhin kan hman thiam a tul thu sawiin, thudik leh dik lo post kawngah finfiah hmasak a tul thu a sawi bawk. AMC hmalakna pawh ZPM ten nasa takin thu dik lo tluantling lo hmangin an theh darh nasa a, Mipuite pawhin thudik hriat kawngah ngaihtuahna fim hman nachang kan hriat zel a pawimawh takzet a ni," a ti.