Aizawl October 21, 2022 : MNF Adviser C.Lalrinsanga, Agricultura Minister chuan MNF chu Pathianin hnama min din ang taka Mizo hnam khawia mi pawh kan dinchhuahna tura Pathian hming lamtute tungding tura din a ni. Harsatna leh buaina te tawk thin mah ila, a hun takah Pathianin min hruai chhuak leh mai thin, a ti.

C. lalrinsanga chuan, "MNF chu hnam tana ding, kan hruaitu hmasa te khan Pu Denga hovin Pathian hminglam chungin an din a, mihring finna mai ni lo, Pathian atang finna an dawn hmang a din a ni a. Mizo hnam hmahruaitu anih angin, 'Pathian leh kan Ram' tan tih thuthlunga neitute kan ni. He hnam min zawng chhuaktu Pathian hming lamtute tungding a, Pathian lam tang lo te a hnawl zel thin a, chu chu party dang te nen kan danglamna a ni. MNF-ah hian Mizo tawh phawt chu kan awm turah ka ngai a, an awm zel pawh ka beisei," a ti.

MNF Adviser chuan, "Congress-ah hian professional an awm tawh lo a, an hmunpui berah pawh Gandhi family an paihbo tawh a, Gandhi family huhang hi a awm tawh lo a nih chuan an te tulh tulh ang tih hi a chiang reng a, mithiamte hmuh danin kum 50 chhung hi an sawrkar leh a rinawm tawh lo. ZPM nise Sub-Hqrs.-ah tu te lam emaw chu an tling leh ta a, lam lam an nei zel a ni, a ti bawk.

Vawiin Hnam Run chhung inkhawmah hian MNF Diamond Jubilee Literature & Documentation-in an buatsaih, MNF dintute thlalak Mizo Hnam Run an tar chu Vice President Vanlalzawma'n khuhhawnna a nei a. Zawma chuan, "MNF dintute hi mi tlawm te te mah nise kan party hian kan ngaihluin kan chhuang tak zet a ni," a ti.