Aizawl: Nimin khan Vanapa Hall-ah MNF party kum 60 tlin, diamond jubilee kharna hun hman a ni a. He huna thusawitu, MNF president, chief minister ni bawk, Zoramthanga chuan, “MNF party hi Pu Laldenga hova din a nih tirh atangin Pathiana innghat tlat a ni,” a ti.

Diamond jubilee kharna inkhawm hi MNF Vice President Vanlalzawma chuan a kaihruai a, thu sawiin MNF President Zoramthanga chuan, “Mizote hi Pathianin China ram atangin Burma ram kaltlangin min hruai thla a. Chhim, hmar leh khawthlang phaizawl tha tak tak thleng lo chiah siin he ramah hian min dah a. He rama Pathianin min dah chhan hi ka chhut fo thin a. Kan chhehvela hnam upa leh sakhaw nghet tak tak nei sa ten min chimral loh nan he ram hi min pe a ni. Kan hnam nunna hi Lalpan helai hmunah hian a thukru a ni,” a ti.

MNF president chuan, “China atanga min hruai chhuak a, helai hmuna min dah hian chhan a nei a. He rama min dah chhan hi Pathianin a chanchintha hril tura min duh vang a ni,” a ti a. “Pathianin Mizote hmangaih taka min hruaina zawng zawng hi MNF that vang emaw, Congress that vang emaw a ni lo a. Vana a lawn dawna Isuan min chah, chanchin tha hril tura he hnam hi min duh vang a ni,” a ti.

MNF chu a dintirh atangin Pathiana innghat party a ni tih sawiin Zoramthanga chuan, "MNF party hi Pu Laldenga hova din a nih tirh atangin Pathiana innghat tlat a ni a. Pathian leh kan ram tan, tiin a lungphum pawh phum a ni a, chu lungphum chu tun thlengin chawhnun zel a la ni a. Kan fel bik vang emaw, kan that bik vang emaw ni lovin Pathian leh kan ram tan tia kan din tlatna hi kan felnaah ruat sak kan ni," a ti a. MNF President chuan, "India leh khawvela chanchintha hril turin Pathianin min duh a, chu chu kan innghah tlatna tur a ni. MNF Party pawh Pathianin he ram tana chanchintha hril tura mi a buatsaihna tihlawhtling tura, kan beih ngar ngarna hi kum 60 min dam tirtu a ni. MNF nghehna, silaimu leh doral hrang hrang kara a damkhawchhuahna hi Pathian leh kan ram tan, tia kan din tlat vang a ni," a ti bawk.

Sr.Vice President Tawnluia pawhin thusawiin, "Silai bomb leh jet fighter hmanga beih a ni chunga Diamond jubilee kan lawm thei hi Pathian hnenah lawmthu kan sawi a. Pathian hruaina liau liaua he hun hi thleng kan ni a. He party hi Pathianin min hruai zel theih nan thil tha tiin a hnenah i inhlan thar ang u," tiin MNF mipui kalkhawmte a chah. Jubilee kharna ah hian MNF founder President Laldenga nupui Lalbiakdiki pawhin thu a sawi bawk.

MNF Diamond Jubilee hi October ni 22, 2021 khan hawnna hun hman a ni a. Kum khat chhung kawng hrang hranga a lawmna hun hman a nih hnuah nimin khan kharna hun hman a ni ta a ni.