Aizawl July 11, 2023 : Prof. F. Lalnunmawia MLA chuan kumtawp inthlan lo awm turah MNF chu sorkar chhunzawm turin boruak a inher fuh chho zel a, chung lamin a buatsaih mek niin a sawi.

Aizawl South III-a Lungsei khuua mithar a lawmluhnaah F. Lalnunmawia chuan, "Zoram hmun hrang hrangah nitin MNF zawm thar an awm a, chunglamin sorkar leh turin min buatsaih mek niin a lang; kan tih ni miah lovin kan elpui party-te tihbuaiin an awm a, hmasawn lam aiin hniam lam an pan zel a, mipuiin an lakah rinna an hloh mek a ni," a ti.

MNF Adviser chuan, "Mi thenkhatten kan sorkar leh kan hotute hi thu belhchian dawllo hmanga beiin sawisel ṭhin mah se, Covid19 hrileng avanga kum 3 vel chauh a taka hna thawhna kan nei chung pawhin kan sorkar hnathawh leh thiltih ṭhat te mipuiin an hai lo va. Chuvang chuan nitin MNF zawm thartu kan nei zel a ni," a ti.

Prof Mawitea MLA chuan, "Zo hnahthlak, hmun hrang hranga chengte chu ram buai avangin Mizoram-ah raltlanin an lo haw khawm a, chungte chu Pu Zoramthanga kaihhruai MNF sorkarin huaisen takin an thlavang hauhin a lo kuahkhawm a, hei hi zoram chhung leh pawna zofaten thlamuanthlak an ti hle a ni. MNF sorkar leh hruaitute hian famkim lohna te chu an nei ve ngei ang. Chutih rual chuan kan sorkarin zofate leh zoram tana theihtawp a chhuahnate mipuiin an hmuhin MNF sorkar chungah rinna an nghat mek a ni," a ti bawk.