Aizawl July 14, 2023 : Vawiin khan Mizo Hnam Runah chhung inkhawm neih a ni a, MNF Sr.Vice President Tawnluia Dy.Chief Minister chuan MNF chu Pathian tih leh rawn chung zela Mizo Nationalism tungding a, Mizo hnam humhim zel tura Zoram rawngbawl tura din a nih thu a sawi a, Mizo Nationalism chu champion pui an tum thu leh party dangte neih ve loh an constitution ah a awm bik niin a sawi bawk.

Tawna chuan, "Kan constitution ah chuan kan ram huam chinin a huam ram leilungte ram rorelna pakhat hnuaia inzawmkhawm hi kan party in a tum bul ber leh mizote sakhua humhim a ni, chu chu India article 371G ah chiang takin a inziak a ni. Mizote nun sakhua, vantlang nun leh an ram leilung te hi a neitu bik an nihnaah India Parliament in a ti danglam thei lovang, tiin kan Constitution ah in ziak ngat a, he article 371G hi engtikawng zawng pawhin humhim turin a tawp thlengin kan bei ang tih hi kan chhinchhiah ka duh a ni a," a ti.

MNF Sr.Vice President chuan, "Kan remna thuthlungah khan ILP pawh Mizoram sawrkar rawn lo chuan India sawrkar hian a thiat emaw a paih thei lo ang, tih a ni. India khua leh tui kan nih chuan keini erawh chuan khawiah pawh in leh lo kan nei thei, Mizoramah erawh ILP telloin hnamdangte Mizoramah an lo lut theilo, kan remna thuthlung hian min humhim tlat a ni, tih te hi ka hriat thar atul a ni," a ti.

Tawnluia chuan, "MNF hi zohnahthlak zawng zawng te tana homeland din tur leh hnam dinchhuah nana din a ni a, MNF hi Mizo hnam party a ni, party dang tan Mizo Nationalism hi sawi a rem ve lo, keini erawh a neitu kan ni," a ti.

Dy. CM chuan, UCC chungchang sawiin, "India ram hi secularism, sakhaw zalenna ram a ni a, chutihlai chuan UCC hi chuan min chawhchawrawi ta a, inkhairual tum na dan hi siam tumna a lian em em a, state thenkhatah phei chuan an pass hlawm tawh a, chutihlai chuan kan party erawh chuan Mizoram kohhran hruaitute leh YMA te nen chuan, he UCC hi a nihna ang ang hman chi a nilo, kan ti a. Keini chuan article 371G tanchhan khan hetia hrut rual ve pawrh chi kan ni lo, kan dikna hi kan humhim zel dawn, kan dikna chanvo humhimnaah kan chian ve a ngai, politics chu a hranin lo kal rawh se, UCC lakah erawh kan inhumhim a ngai a, kan party pawhin kan duh loh thu kan thlen tawh a, kan MP te, kan President leh sawrkar ang pawhin kan thlen tawh a, he UCC hi Mizorama hmang lo turin kan theih chhung chu kan bei zel dawn a ni, a ti. Kan hnam zalenna sualtu hnam martar te neitu party hian thangthar zel te dinchhuahna turin an lo bei tawh a, MNF te hian kan nihna a dingnghet tlat tur kan nihna hi i hre thar leh zual ang u," a ti bawk.