ZALEN January 8, 2023 : Chief Minister kal chhuak ta Zoramthanga'n ngaihtuahna thui tak senga Mizote Jerusalem Aizawl khawpui tawt lutuk leh in ek beng tlurna hmun tiziaawm tura hun rei tak atanga ruahmanna a lo siam tawh Aizawl By-pass road tia kan hriat lar, Aizawl By-Pass Tunnel chu, ZPM sawrkar hnuah BJP sawrkarin a lo tipuitling dawn ta hi MNF chuan lawmman an ti.

MNF chuan National Highways & Infrastructure Development Corporation Ltd., Ministry of Road Transport & Highways, GoI chuan a taka thawk turin Notice Inviting Bid a chhuah ta hial mai hi a lawmawm an tih thu an sawi bawk.

Bangladesh, Myanmar leh Manipur-a raltlante thlavang hauh kawngah na takin MNF kaihruai sawrkar kha a pen a, Central lam duhdan pawh palzutin huai takin hma a la a. Khang thil thleng avangte kha a nih a rinawm a, hmasawnna kawnga Zoramthanga kaihhruai hmalakna kha engemaw chen tihkhaihlak a ni a. Tunah BJP leh a sangawizawnpui ZPM ten sawrkarna an chan tak hnu ah MNF hmachhawp liantham chu a rah hmuh theihin a lo awm chho zel dawn ta a ni, an ti.

MNF chuan, "Tawng umphalo tia ZPM-ten nuihza siam nana Pu Zoramthanga an lo hman nasat thin em em kha, tunah chuan an ministry hnuaiah a rah hmuh theihin a lo awm chho ta hi, MNF chuan heng hna lo lang zel tur hi a tha thei ang bera kalpui turin Pu Duhoma kaihhruai sawrkar a beiseiin, an hnathawh kal zel dante ngun takin a thlithlai reng dawn bawk a ni," an ti.