Aizawl: BJP Mizoram Pradesh chuan MNF president hian BJP thawhpui lo angin insawi thin mah se, an thawhpui ngei tih an sawi a, khaw eng pawh zah map lova hetianga a la sawi ngam hi ‘Pathian leh kan Ram tan’ titu party tan chuan thil inhmeh lo takah an ngai bawk.

Nimin khan BJP Mizoram Pradesh hian thuthar lakhawmtute an hmachhawn a, an General Secretary Vanlahmuaka chuan, “Kum 1998 chhova NDA-BJP kaihhruai A.B.Vajpayee sorkar lai khan Mizorama MNF sawrkar lai a ni a, khatih laia an MP Vanlalzawma pawh khan a zu support a ni. Tun MLA inthlan dawn pawh khan MNF President leh Chief Minister ni ta Zoramthanga hian Congress party ni lo, MNF, ZNP leh MPC te chu 2014 MP election dawn khan NDA-BJP kaihhruaiah an tel thu a sawi a ni,” a ti.

Hmuaka chuan, “May 28, 2019-a Parliament Central Hall-a NDA-BJP kaihhruai MP te kalkhawmnaa BJP national president Amit Shah-a’n Prime Minister atana Narendra Modi a rawt naah pawh khan meeting convener pawhin MNF chu thlawptu zingah an tel thu a sawi a. MNF president hian UPA chu Congress kaihhruai an ni a, NDA chu BJP kaihhruai a nih thu hi a sawi fo a, NDA thlawptu lam an nih thu hi a sawi dan pawh a ni,” a ti.

June 17, 2019 hian Parliament thutkhawm hmasaber neih a ni dawn a, hetah hian MNF nihna chu a takin chiang taka hmuh theih a nih tur thu sawiin, BJP Mizoram Pradesh GS chuan, “MNF hian NDA-BJP a support leh support loh hriat duh chuan Parliament thutkhawmah an MP neih chhun C. Lalrosanga an thut tirna hi lo thir ila, thudik chu sawi ngai lovin a hriat mai ang. Heti chunga Mizoram mipui hriata khaw eng pawh zah map lova BJP kan tan ngai lo, tia a la sawi pap pap ngam hi Pathian leh kan Ram tan titu party tan chuan thil inhmeh lo tak a ni,” a ti zui bawk.