Aizawl April 5, 2024 : MNF chuan thuchhuah siamin, "ZPM-in Lok Sabha MP inthlanna neih tura Campaign Kick Off an neih tuma Chief Minister Pu Lalduhoma'n 'MNF MP te chu NDA Parliamentary Whip in a thunun avanga mahni duhnaa vote thlak thei lo' anga a sawi kha amah ngei pawhin thudik lo a ni tih a hriat chian sa, langsar taka dawt hmanga mipui bum tumna a ni a. Chief Minister meuh tih atan chuan hniam kan tiin thil zahthlak takah kan ngai," an ti.

MNF chuan Ni 1.4.2024-a ZPM Party in Vanapa Hall-a Campaign Kick Off an neih tum khan Chief Minister Lalduhoma chuan MNF MP te chu NDA Parliamentary Whip thununna hnuaia awm anga sawiin, NDA Whip kalha vote an thlak chuan MP atanga ban tir (disqualify) theih ang leh chumi avanga duhnaa vote thlak thei lo thin angin sawi a. Hei hi politics khelh dan tha lo ber chi, hre reng chunga mipui bum tumna a ni a. MNF MP te hi MNF party ticket-a thlan tlin an nih avangin eng Whip mahin a thunun lo a, NDA kalha vote an thlak avanga disqualify theih pawh an ni lo a, Mizoram, Mizo Hnam leh Sakhua himna khawih thilah te chuan huaisen takin central sorkar pawh an dodal thin tih a taka hmutu leh hretu chu mipuite an ni, an ti.

Chief Minister Lalduhoma hi Whip tih tawngkam behchhan ber India danpui, Constitution schedule 10-na hmanga MP leh MLA atanga disqualify lo tawk tawh, he Dan hrechiang bertu tur a ni a, he Dan hi thlan tlin an nih hnua party dang zawmtu, anmahni candidate-a vawrh chhuaktu party duh dan kalha vote thlaktu, MP leh MLA te disqualify theihna a ni a, UPA emaw, INDIA emaw, NDA emaw anga party hrang hrangte awm hona ang chiah Whip a awm lo a, Party mal tin inkhuahkhirhna a ni zawk tih pawh a hrechiang ber tur chu Chief Minister Pu Lalduhoma hi a ni. Hetihlaia MNF MP te NDA Whip thununna hnuaia awm ang leh an duhdan kalha vote thlak thei lo anga a sawi hi hriat sual palh vang ni lovin, hre reng chung si-a langsar taka dawt hmanga mipui bum tumna, politics khelh dan tha lo ber chi, mipuite pawhin an hnawl tawh hnu a ni a, Chief Minister meuh thusawi atan chuan hniam an tiin zahthlak an ti a ni.

MNF MP te hi MNF Ticket hmanga inthlanna chuh an nih thin avangin MNF Whip tih loh pawl dang reng reng whip in a thunun lo a. Tunhnai maia thil thleng, Biren Singh-a kaihhruai, Manipur BJP Sawrkar hnuaia Kristian te Biak In tam tak hal a nih vanga Parliament-a eptuten Central sawrkar paihthlakna tur motion an putluh pawh khan Mizoram MP pahnih K. Vanlalvena leh C. Lalrosanga te chuan lansar taka thlawpin, ram, hnam leh sakhaw humhimna turin nasa takin an tang tih Mizoram mai ni lo, India mipuiten an hria a. Ramri buainaah te, Myanmar leh Bangladesh atanga zohnahthlak Mizorama rawn tlan lutte lo tuam hlawm kawngah te leh UCC dodalna kawngah te MNF MP te hi huai takin Zoram leh Mizo mipuite tan an ding zel a, hun lo la kal zel turah pawh, 'Kan Ram, Kan Hnam leh Kan Sakhua' himna khawih thilah reng reng MNF leh MNF MP te hi pen khat pawhin kan hnung tawlh ngai dawn lo tih Zoram mipuite hriatpui reng turin an ngen a ni.