Aizawl July 1, 2023 : Mizo National Front party chuan, “Pathian nen lo chuan ka kal ngam tawh lo,” titu, MNF senior vice president leh deputy chief minister ni bawk, Tawnluia chu an chhuang tak zet tih an sawi.

Nimin khan Aizawl Press Club-ah chanchinbumite kawmin MNF Media & Publicity hotute chuan deputy chief minister leh MNF senior vice president ni bawk, Tawnluia chu Mizoramah eng pawh lo thleng se ‘ram leh hnam tan a him em? kan sakhua tan a him em?’ tih ngaihtuah hmasa thin a ni tih an sawi a. MNF General Secretary VL Krosshnehzova chuan, “July 26, 2021 khan Assam chuan Mizoram ramri rawn lutin kan duty post an rawn luhchhuah a. Hetah hian Dy CM Tawnluia thurolum chu, ‘Kan duty post hi tlai dar 5 hmain engti zawng pawhin kan la let leh tur a ni,’ tih a ni a. Chief Minister Zoramthanga nen sawi dunin thutlukna lian tak siam a ni ta a. Silai a puak ta a, kan ramri kan la let mai ni lovin, Mizoramin ramri-ah nasa takin hma kan sawn phah ta a ni,” a ti. 

Dy. CM Tawnluia chu a kum lam lo tam deuh tawh mah se, a department enkawl a hneh em em tih sawi bawkin, “Zirna lamah Science subject background nei a lo ni bawk nen, technical thil thlengin a hre bel hneh em em a. Ani hona hnuaiah hian PHE, UD&PA leh Personnel & Administrative Reforms chuan hma a sawn nasa em em a. Zoram tan hna ropui tak tak leh chhinchhiah tlak tak tak thanhnem tak an thawk a ni,” tiin, sawrkar hmasate engmah thawk lo anga party thenkhatin an puh chu a dik lohzia a lang chiang hle niin an sawi bawk.

MNF-in Dy. CM Tawnluia hnuaia hnathawh an tar lan thenkhat:

* Housing for all hnuaiah in sakna 5,026 pek a ni tawh a, sak zawh tawh 2,309 a awm.

* DAY-NULM hnuaiah tun hnai kum thum chhungin mi 3,220 train chhuah an ni a. Heng zingah hian mi 2,246-in pass chhuakin certificate an dawng a, chung zingah chuan mi 1,583-in eizawnna atan an hmang tawh.

* Parking House Support Scheme (PAHOSS) hnuaiah mi 11-in zovin Third & Final Installment pek tawh an ni a. PAHOSS beneficiary, agreement sign-pui theih, 1st Installment, 2nd Installment leh 3rd Installment pek mai theih mi 201 an awm a. Sum pek chhuah tur zat hi Rs. nuai 1,036.90 a ni.

* SEDP 2019 – 20 huam chhunga sanction nuai 6,000 atangin hna lian 900 chuang thawh mek leh thawh zawh tawh a awm a. Special Central Assistance hnuaiah Land Development of Solid Waste Management Centre khaw pangaah thawh mek a ni.

* SIPMIU hnuaiah Water Supply tui semna pipe km 309.04 siam thatna leh siam belhna hnathawh a ni a, he hmalakna hi kalpui mek a ni a, 92.36% zawh tawh a ni a. Aizawl khawpui tan tui thianghlim lakna tur hmun thar 37 MLD Water Treatment Plant chu Setlak lui leh Tlawng infinna bul, Industrial Growth Centre-ah sak mek a ni a, 92.12% zawh fel tawh a ni. 

* Aizawl Smart City Ltd. hnuaiah hna 17 thawh mek a niin hei bakah hian project 16 tender mek a ni a, DPR siam mek project pali a awm bawk.