Aizawl August 15, 2022 : MPCC chuan India India Independence champha vawi 75 na chu Congress Bhavan, Aizawlah lawmna hun hman a ni a. Chawhma dar 11:00 khan Congress Bhavan kawtah India Flag chu Lalsawta, President, MPCC chuan a pawt pharh. Congress President chuan, "MNF-in Mizoram an sawp chhiat nasat zia kan hria, hemi sawi nan hian Minute khat pawh ka ui tawh," a ti a, ZPM chu mi tam takin an rin tlat loh avangin an tlin zawh a rin loh thu leh 2023-ah sawrkar ngei tura hmala turin Congress party leh mipuite a sawm. 

Lalsawta hian India zalenna sual dan sawiin, “Kum 1600 chho vel atangin India ramah East India Company an lo lut tan a, a tawpah phei chuan India ram pum chu British rorelna hnuaiah kan kun ta hial a. India ram ropui tak leh mipui chhuanawm tak takte ram dang awpna hnuaia kan awm reng mai kha kan hruaitu hmasaten dik an ti thei ngang lo a, nasa taka hma lain kum 1947 August 15 khan India ramin Zalenna a nei thei ta a ni. Hnam hrang hrang leh sakhaw hrang hrang zuitu mi vaibelchhe tam takte ram rorelna pakhat hnuaia kan awm thei hi a ropui takzet a. A hunlaia mithiam tam tak phei chuan rei kan awmkhawm theih hi an ring lo a, mahse kan thei tlat si. Communist Lalpa, Russia Premier Khrushchev-a, Pathian awm ring miah lo pawhin ropui a ti lutuk a, ‘India rama ka zin atangin Pathian awm ka ring ta,’ a tih phah hial a ni,” a ti.

Ram hruaitute pawimawh zia sawiin Lalsawta chuan, “Khawvela ram hrang hrangte hi Pathianin thil pahnih - ram leh mipui min pe vek a, a enkawltute a zirin nasa takin a danglam thei. North Korea chu a enkawltu ram hruaituten an zir loh avangin khawvela ram hrehawm berte zinga ngaih a ni. South Korea erawh khuanzinte tlawh chak em em, khawvela ram nuam leh zalen berte zinga mi a ni. Heng ram pahnih te thil neih hi a inang deuh vek chungin an dinhmun a inthlau em em a ni. A enkawltu pawimawh zia hei hian a tarlang chiang hle a ni,” a ti.

Mizoramah Congress leh party dang pahnih te chungchang sawiin, “Kum 20 chhung ram buai vangin mi state hnungah tlai taka kan kal ve chungin tunah chuan state dang kan tluk chho ve tan ta. Heng hmasawnna tam zawk hi Congress tih a ni. Duhthusam leh sawiselbo erawh a ni lo tih kan hria. MNF-in Mizoram an sawp chhiat nasat zia kan hria, hemi sawi nan hian minute khat pawh ka ui tawh. ZPM hi mi tam takin an rin tlat loh avang hian kum 2023 inthlanpui lo awm turah hian rilru dik leh fel tak puin, rim tak leh hah takin Pathian malsawm tlaka thawkin, tum thuhmun nghet tak nen a chhe lai siamtha tura tih tak zeta kan thawh chuan he ram hi kan siamtha thei. Chutiang tur chuan theihtawp chhuah turin Congress mipuite ka sawm a, chu chu Mizoram mipuiin min beisei dan pawh a ni,” a ti.