Aizawl; MNF party chuan kumin kumtawpa Mizoram MLA inthlanpui lo awm turah mipuite duhsakna hmanga an sawrkar leh ngei an beisei tih an sawi.

Vawiin khan Aizawl Press Club-ah chanchinbumite kawmin MNF Media & Publicity Department chuan kum 2018-a sawrkarna an chan atangin thapui thawhin hma an la nghal tih an sawi a. Mahse kum khat emaw chauh hmalakna an kalpui tihin khawvel pum huap tibuai khawp hripui vangin harsatna an tawk ta tih an sawi. 

Media & Publicity General Secretary VL Krosshnehzova chuan, “Kum hnih chhung zet hripuiin min nuai a, kan sum hmuh tura beisei tam tak kan hmu lo a. Covid vanga kan sum hmuh loh belhkhawm hi vaibelchhe 2,632.58 a ni a, hetih lai hian hripui do nan vaibelchhe 70 vel lokal mahse kan sum hmuh loh hi a tam hle a. Hei mai ni lovin ruahman lawkna awm lo raltlan puihna, Bussiness 20 thlenna, district tina Y-20 buatsaihna leh International Tourism Mart thlenna atan te hman a ni,” a ti.

MNF general secretary chuan harsatna hrang hrang karah sawrkar chuan theihtawp a chhuah tih sawiin ei leh bar, tui leh êng a hnianghnar te, kawngpui thar sial a ni te, building tam tak sak a ni te, khelmual siam a ni leh hmasawnna hnathawh hrang hrang hmuh tur a awm chu lawmawm an tih thu a sawi a. “Sawrkarin a hun tawngah harsatna hrang hrang a tawh avangin beisei phak chiah lo mah se kan harsatna tawhte min hriatthiampui a, hun ralmuang zawk lo thleng zel turah hian Zoram mipuiten min sawrkar chhunzawmtir kan ringin kan beisei tlat a ni,” a ti bawk.