Aizawl: MNF party chuan nimin khan Aizawl veng hrang hrangah Street Campaign a nei a, Minister leh party hruaituten thu an sawi.
Chanmari kawn leh New Market-ah thusawiin MNF MP candidate C.Lalrosanga chuan, “Thalaite eizawnna mumal nei lo tam tak an awm a, thalaite talent tha tak tak eizawnna atana hmang chhuak thei tura haichhuahsak ka tum a ni,” a ti a. CAB 2016 theih tawpa do a tum thu leh Kristiante nekchepna do a tum thu a sawi bawk.
Dr R Lalthang liana chuan Tennis Court, Khatla kawn leh Govt. Complex-ahte thu a sawi a. “Congress leh ZPM-te candidate hi mipui candidate a ni lo. Mipui candidate ti zawnga kan sawi dawn a nih chuan thla 3 mai kaltaa Zoram mipuiin sorkar tura hneh taka an vote tlin MNF candidate hi mipui candidate a ni zawk ang. Parliament House-ah hian private MP han thu se an ho ngawt ang,” a ti.
P&E Minister R Lalzirliana pawhin Bawngkawn leh Durtlangah thusawiin, “Road Tax lak dan siam that a nih tak avangte, kawngpui siam that a nih mek avangte hian Motor neitu leh Driver-ten MNF MP candidate an vote ka ring,” tiin a sawi a ni.
Nimin street campaign-ah hian Lalchandama Ralte, Education Minister, Sports Minister Robert Romawia Ralte, Er Lalrinawma, Dy Speaker te chuan veng hrang hrangah thu an sawi bawk.