ZALEN February 4, 2025 : Village Council inthlan lo awm tura campaign mek MNF Senior Vice President Dr. R. Lalthangliana chuan South Tuipui bial a khaw hrang hrang te a tlawhnaah, MNF chuan VC/LC inthlan a huphurh loh thu leh VC fund chu central atanga rawn pek thin a nih avangin rulling VC neih kher a tul loh thu a sawi.

Hnahthial, Cherhlun, Thingsai, Khawhri, Tarpho, S. Chawngtui, Aithur leh Bualpuite tlawhin party mite nen inkawmhona an nei a, Dr. R. Lalthangliana chuan ZPM sawrkarin VC term thla ruk zeta a pawh tawi court-a khinna thutlukna chu hriat la ni lo mah se, MNF chuan engtik hunah pawh VC leh LC inthlan chu an inrin reng thu leh an huphurh loh thu a sawi.

Dr. Thangtea chuan, "VC leh LC tan hian central sawrkarin ruahmanna fel tak siam sain state sawrkarah sum a rawn pe thin a, central-in VC-te tana sum a rawn pek hi state sawrkarin an rawn pek atanga ni 15 chhungin a changtu tur VC hnenah a pek ngei a ngai a, a pe lo a nih chuan hremna atan a pung awmin VC-te hnenah sum hi a pek tho tho a ngai a ni. Chuvangin, kan khawtlang enkawl tur hian ruling party VC kher neih a ngai lo tih i hria ang u," a ti bawk.