ZALEN March 12, 2026: Zoramin zalenna a sual laia hnam sipaia lo tang tawhte pualin vawiin khan Mizoram Independent puan Diamond Jubilee lawmna, Ex Mizo National Army huaihawtin Chanmari YMA Hall-ah an hmang. He hunah hian hnam sipai leh an nupuite an kalkhawm.

He huna khuallian, zalenna sual laia Brig. General Tawnluia, Ex Army Chief chuan, "Kum 1966, kum tam tak kaltaah khan Mizo Hnam Pa Pu Laldenga kaihhruaina hnuaiah zalenna kan puang a. Independent an sual lo, tia MNF sawi thinte hian an hresual a, thudik lo an sawi thin a ni. Zalenna kha chiang takin kan sual a, kan martar pui a ni," a ti a. "Army Chief-ah kum 8 zet ka awm ve a, silaimu leh ral karah hun kan hmang a. Martar tam tak an awm bawk a ni. Kan theihna zawng zawngin Zoram zalenna nan kan thawk a, kan inpe a ni," a ti.

Ex Army Chief chuan, "He hnamin zalenna sang ber a neih theihna tura beia, mahni kea he hnam a din theihna tura beitu zawng zawngte zahna chibai vawiinah hian kan buk thar leh a ni. Martar-te thisen hlutzia kan hrereng a ni," a ti a. "Zalenna sual laia beitu zawng zawngte bakah, sipai sawisak leh hliam tuar te, in hal sak leh sawikhawm tuar te, Hnam sipai tana lo thawk tawh leh lo pui tawh zawng zawngte chungah lawmthu kan sawi a. Khawvel hmun hrang hranga Zohnathlak leh hmun hrang hranga awmte lawmthu sawina chibai kan buk bawk a ni," a ti.  

Tawnluia chuan, "Independent puan atangin India leh khawvelin Mizo hnam min hriat phah a. Zalenna sual nachang hre hnam, mahni dikna atana bei ngam hnam kan ni hi min zah phah hle a ni," a ti a. "Thangthar zelte'n nationalism hi chhawm nung zel se ka duh tak zet a ni," a ti bawk.

"Remna leh muanna kan neih theih nana min nawrtu thekhat ten 'MNF an in surrender' tiin min sawi leh si. MNF kha kan in surrender lo a, kohhran leh mipui ngenna leh nawrna avangin India nen inremna kan siam mai a ni," a ti bawk.  

MNF Sr. Vice President Dr R Lalthangliana, MLA pawhin thusawiin, "Hetiang hun, zalenna sualtute inhmuhkhawmna hun tha tak inhmang thei hi lawmawm ka ti hle a ni. Zalenna sualtute in inpekna zawng zawngah lawmthu ka hrilh che u a ni," a ti a. "Nationalism chi nung thangtharteah kan tuh zel a, a lo par vul zel hi a tul hle a ni," a ti bawk. 

Leut. Lalchamliana (Ex Home Minister), National Core Committee, MNF pawhin thusawiin, "Kum 1966-a ram leh hnam kan hmangaihna kha a nasa em em a, kan nunna hlu tak ram leh hnam tana hlan turin kan inpeih at a ni. Ram leh hnam hmangaihna kawngah 'spirit of 1966' kha thatharte-ah lo thar leh se ka duh hle a ni," a ti a. "Zalena kan sual khan kan ta lo tur kan dil a ni lo a, kan ta min neih sak neih let leh tumin kan bei a, zalenna kan sual a ni. Zalenna kan sual kha kan tisual lo a, mipui remtihna thlapa sual kan ni," a ti bawk.  

He hun hi Rochungnunga, Ex MNA President-in a kaihruai a, zalenna sual laia lo rammu ve tawh Rev Vanlalbela'n hunserh a hmang a. Brig. General Tawnluia, Ex Army Chief-in zanriah a buatsaih chu an kilho a ni.