Aizawl December 21, 2022: Media & Publicity Department, MNF General Headquarters leh MNF Thalai, Mizo National Youth Front te chuan vawiin khan chanchinthar lakhawmtute an kawm a, Covid-19 hripui avanga Krismas vawi hnih hman theih a nih loh hnua 2022 Krismas Pathian hruainaa kohhran ho ten an hmang thei tur chu lawmawm an tih thu an sawi a, Zoram mipui te Krismas chibai an buk a, ram hruaitute tana tawngtai thin te hnenah lawmthu an sawi. 

MNF chuan, kum 2018 inthlanpui neih a nih dawna an dilna chu Pathianin a chhang tiin MLA bial 40 ah MNF candidate bial 26-ah thlan tlin niin,  Zoramthanga kaihhruai MNF sawrkar thar a piang, an ti. 2019 leh a hnu lama inthlanna – MP (LS), Aizawl Municipal Corporation (AMC), Local Council (LC), Village Council (VC), Lai Autonomous District Council(LADC), Chakma Autonomous District Council (CADC), Sinlung Hills Council (SHC), Sialkal Range Development Council (SRDC) te bakah Aizawl West-I leh Tuirial bial MLA Bye Election-ah te Pathian leh mipuite zarah MNF in hnehna changin MLA pawh 2 lai kan neih belh leh an ti a, Pathian leh Zoram mipuite hnenah lawmthu an sawi a ni.

MNF chuan Lockdown chi hrang hrang avangin ni 718, kum hnih dawn lai kan hmachhawn an ti a. Hripui dona kawnga Zoram mipui, tlawmngai pawl leh kohhran te inpekna leh thawhrimna a ropui an ti a, lawmthu an sawi. Kan tanrualna hi chung lam pawhin mal a sawm a ni ngei ang, India ram state zingah thihpui tlem pawl kan ni hial a, December ni 16, 2022 atang phei chuan Covid vei awmlohna state kan lo ni ta hial a ni, an ti.

He hunah hian MNF Thalai chuan, Ramin harsatna a tawh lai mekin a theih chin chinah ram hruaitu ten chawl lovin hna an thawk reng an ti. Hun harsa tak kara MNF sawrkar hmalakna thenkhat te tarlangin, Zu zawrh tih tawp a nih thu te, District thar function tir a nih thu te, Chhungkaw 60000 hnena SEDP sem a nih thu te, National Highway laih hna thaw a nih theih nana Mizoram sawrkar hmalakna te , Leilet tin 800 nai nawrh zawl a nih thu leh Vaimim herna khawl bun tura hmalak a nih dan leh vawiin khan 50 semchhuah phawt a nih thu te an sawi. 

Hripui len laiin Pathian hruaina zarah nitin mamawh buhfai, eirawngbawlna Gas leh thildangte hnianghnar taka hmuh a nih thu te, Aizawl khawchhunga bungraw phur lirthei lian luh reng ngai tawh lo turin Aizawl bypass Road siam a nih tur thu te, Central budget-ah bypass Road atan Crore 500 leh Bamboo link road atan crore 100 dah fel a nih thu leh Aizawl hnuaia leihverh siamna tur pawh Central-in a pawm fel chuan traffic jam nasa takin a ti ziaawm dawn an ti. 

MNF thalai chuan Health Sub-Centre 247 Health & Wellness Centre-ah hlankai a nih thu leh Health & Wellness Officer 240 lak fel a ti tawh an ti a, Health Sub Centre la awm ngai miah lohna khaw 327-ah Health Clinic Centre hawn thar a ni an ti bawk. Mizo tawng humhim tur leh ti hausa turin Mizo Language Development Board(MLDB) Bill Assembly House-ah pass a nih thu an sawi. 

MNF sawrkar kum li chhungin, School timing danin her danglam a nih thu te, Zirtirtu Regular 152 leh MR 880 lak thar an nih thu leh Zirtirtu 548 Head/Principal-ah kaisan tir an ni a, Samagra Siksha hnuaiah Elementary School 2, High School 9 hawn thar niin HSS Sikul 19-ah Science Stream, sikul 15-ah Arts Stream leh sikul 10-ah Commerce Stream te hawn thar niin, Hindi Teacher 818 (M/S 627 leh H/S 191) lak thar anni, an ti bawk.

2001-a Sports Incentive MNF sawrkar hmasa in a lo duan chu ennawn a nih thu leh tun sawrkarah hian tipungin Mizoram Sports Incentive Cash Award Scheme 2022 pawm fel a ni, an ti. Tunah hian Olympic-a Gold Medal latu in cheng nuai 100, Silver in nuai 75, Bronze medal in nuai 50 an dawng tawh dâwn a. Tin, Commonwealth Games/ Asian Games/Youth Olympic Games-a Gold Medal latu in nuai 25, Silver medal in nuai 15 leh Bronze medal in nuai 7.5 an dawng tawh dawn a ni.