Aizawl July 29, 2024 : Vawiin khan Mizo Hnam Runah chhung inkhawm neih a ni a. He hunah hian MNF Legal Board Chiarman C Lalramzauva, PAC member chuan thu a sawi a. "Mizoram tana pawimawh em em, the Mizoram (Protection of Rivers) Act 2023, sawrkar hmasa hunlaia pass tawh chu ZPM sorkar hian Nodal Department tur pawh an la siam fel lo a. Chu dan pawimawh tak chu an la mut tir mai mai a ni," a ti.

"Khawchin inthlak zelah kan luite enkawl a, vemhim a, humhalh a tul tehlul nen lui 16 zet enkawlna tura sawrkar hmasain dan a lo siam tawh chu ngaihthah a ni mek a. An la then vel mai mai hi a pawi tak zet a ni," a ti a. C Lalramzauva chuan, "A dan hi tha tawk lo awma an hria a nih chuan siam tha se, hetiang dan pawimawh lutuk mut tir mai mai hi a dik lo a. Inneihna vela kal leh khuallian vela tanah an la lungawi tawk niin a lang," a ti bawk.

Senior Advocate C Lalramzauva chuan, "Mipuite tana dan hlui tawh ZNP an nih hunlaia kan CM ni ta Lalduhoma pawhin tih tawp tha a ti a, a CM hnu pawha tih tawp tha a la tih zui zel Riverine Reserved Forest, 1965 chu tunhnaiah tinung tura hmalak leh a ni a. ZNP an nih lai khan Assembly House-ah a member pui K Liantlinga chu Mizoram Assembly paruknaah Resolution putluh tirin, Riverine Reserved Forest Area thiata tlang sang lama sawn rawtna a thlen tir a, hei hi House pawhin lungrual takin a lo pass tawh a ni. Hemi hnu November 19, 2019 maiah pawh khan House-a Official Resolution pakhat sawihonaah tlang sang lama Reserved Forest sawn a tul thu leh luipui kam ram thalaite hman tangkai theiha siam a tul thu a sawi leh bawk a ni," a ti.

"Hetihlai hian tunah chuan a dinna thlak leh thutin, Riverine Reserved Forest tih nun leh tumna chu Pu Lalduhoma kaihhruai sawrkar hnuaiah Mizoram sawrkar Advocate General chuan a lo thlawp leh ta daih si hi a mak hle. Kan CM hian eng rilru nge a put tih hi ka zawhna a ni," a ti.

MNF PAC member chuan, "Kha leh chen thil tha a lo sawi tawh a, thil tha tinreng ti turin an intiam a. Pu Duhoma sawrkar-in min hruai dan tur hi a lang ruak tawh a, a ropui lem lo viau dawnin a lang. An sawi loh dan ang hlirin an awm chho ta a ni ber awm e. Tawngkam thiamna leh dengkhawng tak taka min beih a, ram tha lo lehzuala min hruai luh an tum ni berin a lang," a ti.  

C. Zama, President, Ex-MNA chuan kum 40 kal ta a MNA pathum Churachanpur Branch State Bank rawka puh mi pathum

Sgt. Lalzarliana s/o. Lalhmingthanga, Thenzawl

Pte. Biakhluna s/o. T. Lalhnema, Kolasib

Pte. Vanlalhruaia s/o. L.K. Siama, Thingkangphai, Churachanpur te case chu theihtawpa umzui a nih hnuah, ni 23 July 2024-a tihtawp a nih tak thu report ngaih thlak a ni bawk.