Aizawl June 19, 2024 : MDC by-election Lawngtlai L-IV Chanmari a neih tur atan Vawiin June 19, 2024 hian MNF Senior Vice President Dr. R. Lalthangliana chuan Lawngtlai MJA Press Club-ah Press Conference a nei a, MNF leh Congress chuan ram tana thil tha a nih chuan hnathawh an inchhunzawwm sak mai thin niin a sawi.

Dr. R. Lalthangliana chuan, "MNF leh Congress hi chu party ruhrel lian leh nghet an ni a. Kum 30 lai politics khela MLA ka lo nih ve tawh hnuah MNF leh Congress khan ram tana thil tha nia an hriat chu tha takin an chhunzawm sak mai thin. Sawrkar hmasa thil tih sawi chhiat chiam chiam an ching ve ngai lo. ZPM kal dan erawh hi chu a hun la reilo mah se, hriat thiam a har khawp mai, sawrkar hmasa thil tih an sawisel nasa hle a ni. Sawrkar thar hi chu pawl hrang hrang paruk vel kalkhawm, mize inanglo tak tak an ni a. Chief Minister, Minister leh an MLA thenkhatte hi vawi khat mah la ni ngailote an ni a. Manifesto of visionary (duhthusam ram) an sawi a, an han sawrkar a, an tum ang a lo ni si lo," a ti.

India ram inawpna danah hian Village Council hi dinhmun pawimawh tak a ni a. Mi rintlak thlang chhuak turin ka ngen che u a, boruak tha tak hnuaiah mi tha tak thlang chhuak u la. Tun laiah chuan sawrkarah VC-te an pawimawh ta hle a, sawrkar khalh ngil turin rulling chauh ni lo, opposition in an pawlhte hi a that vena chin a awm a ni, a ti bawk.