ZALEN September 4, 2023 : Vawiin Mizo Hnam Runah chhung inkhawm neih a ni a, MNF Adviser Lalrintluanga Sailo, MLA chuan thu a sawi a, MNF MLA 28-te chu mahni inhaivur turin hma an la hman lo a, ram tan ke an pen miah miah zawk niin a sawi.

MNF Adviser chuan, MNF sawrkar hnuah harsatna hrang hrang a thleng tih sawiin, 'Hrileng vangin kum hnih leh thla thum chhung Kohhranho pawh inkhawm thei miah loin, Zirna In leh Sumdawnna zawng zawng kal hlei thei loin kan awm a. Chumai ni loin khawchhak lamah lirnghing te a thleng. Chumai ni loin ramri buai, tum danga kan tawn ngai loh leh kan la hriat ngai loh, inkah ngai hialin a thleng a. Kan châk lakluhna kawngpui dan pinsakin kan awm a. Harsatna nasa tak karah hruaitu tha leh rintlak, Chief Minister Zoramthanga kan nei a. Pathian kaihhruaina changin mipuiten ei leh bar, nitin mamawh thilah harsatna lian lutuk tawk lovin tun hun hi kan thleng a ni. Min beitute hian eng thil pawh ti ila min bei zel dâwn, mahse mipui tan kan beihna kawngah kan tangmar zel dawn a ni. MNF MLA 28-te hian mahni inhaivur turin hma kan la hman lo, ram tan kan pen miah miah mai a zawk a ni, a ti.

Lalrintluanga Sailo chuan, ‘Hun khirh leh harsatna karah pawh kan ramin hmasawnna kawng dik a zawh zel theihnan tha thlah lova theihtawp chhuah chhunzawm reng a ngai a, party chhungah hian kan hotuten min dahna hmun apiangah thuawih tak a kan awm reng a pawimawh hle a ni," a ti bawk.