Aizawl October 20, 2022 : MNF Headquarters' thalai ṭhukhawm chuan Mizo thalai leh zirlaite tan tangkai zawka MNYF-in hma a lak theih dan tur te, ram pum huap MNF thalai intawh khawmna Aizawl hmuna buatsaih tum chungchang leh party tana tangkai zawka MNYF kal chhoh zel dan tur bakah Diamond Jubilee kharna inkhawm neih tur thlir lawkna hun te an hmang a ni.

He hun kaihruaitu MNYF President L. Thangmawia chuan MNF thalaite chu Diamond Jubilee chibai bukin ram tana tha leh zung tam tak an sen tawhnaah lawmthu a hrilh a. Kum 2023 inthlanpui neih turah Pathian hruaina a kum 60 chuang mipuite tana lo ding tawh MNF Party hi Pathianin sawrkarna hun a la pek belh ngei dawn, a ti.

MNYF President chuan“Politics hi mipuite tana thawhna tur a ni a, firfiak taka kalpui tur a ni lo. Tunlaiah firfiak taka politics kalpui, ram tana tangkaina awm miah lo, mi mimal nun thlenga rem leh rem lova phuahchawpa rinthu huai taka sawi ching Party an awm thar ta chu a pawi hle a ni,” tiin, "Chung mite chuan Pathian kohhran thianghlim thlenga 'bawl' a, sawrkarna lak mai theih inringin 'Kohhran hi kan Unit' te an ti a, mahse chung lam hian mal a la sawm lo zel rih a ni," a ti. 

Thangmawia chuan, "MNF Founder President, Mizo Hnampa, Pu Laldenga’n a hlauh em em “Mi hausa game”ah tute party emaw chu an lut mek. An Headquarters-in bial vil bik neih a phal loh laiin mi hausa, an party tana thawh hlawk tak te chuan duhthalin bial an vil mek. 2023 inthlan candidate puan hun a thlen huna buaina nasa tak tawk tur party an awm a ni," a ti.

A chungchang sawiin Lengteng bialtu MLA chuan, “Hotute duhsaknaa Lengteng biala MLA vawi thum lai ka din ve lai khan ka khingpuite vawikhat mah ka sawisel ve lo tih hi Lengteng bial mipuite'n an hre ngei ang” a ti a, “Dawta 2018 inthlan dawna HEL pawl ruaia min puhtute pawh thinlung takin ka ngaidam zawk a ni” a ti. “Duh huna midang fak thiam tak, duh loh huna a chhe thei ang bera sawisel leh thiam nih hi CM nihna tur ni se chuan tu emaw chu vawi tam tak a CM tawh ngei ang” a ti.

Sum dinhmun chungchang sawiin MNYF President L.Thangmawia chuan, "Finance Commission hi India ram state hrang hranga sum pek dan tur ruahman tu a ni a. 13th Finance Commission kha a ṭha lo hle a. Chuvangin, khatih laia CM zahawm tak Pu Hawla khan “Kan sum dinhmunin a sen a kawk a ni” a ti hial a. Pu Sawta Finance chan hnu a 14th Finance Commission kha a lo tha chho a, sawrkarin Zu a zawrh tak avangin zu chhiah atangin vaibelchhe tam tak a lut bawk a. Khatih lai khan tupawh Finance Minister ni se, Mizoram sawrkar sum dinhmun kha a ziaawm a ni tih hi finance lam mithiamte chuan an hre vek ang. Tuna 15th Finance Commission hi a lo tha lo leh hret a, chumi piah lamah Covid hripui avangin chhiah lut India ram pumah a tla hniam duai duai a. Chu chuan Mizoram chauh ni lovin state zawng zawng a nghawng a, central sawrkar pawhin state hrang hrangte lei bat phal zat a ti pung ta hial a. Heti chunga rui lo hai lova Finance enkawltu, kan CM zahawm tak Pu Zoramthanga avang hian sawrkar hnathawk hlawh leh mamawh zualah duhthusam phak theih ni rih lo mah se, harsa tak chungin kan kal hram hram zawk a, hun harsa hmachhawn tur hian fel leh ṭha intite thlang lovin mi tlawm tê tê te kutah Pathianin mawhphurhna a nghat zawk a ni," a ti.