Aizawl July 4, 2023 : Vawiin khan Mizoram Chief Minister Zoramthanga chuan Shri Khetrasbasi Biswal, Member Secretary, Law Commission of India chu lehkha thawnin Mizonational Front chuan Law Commission of India-in Uniform Civil Code chungchanga June 14, 2023-a Public Notice an tichhuah chu chhang let in an pawm loh thu a hriattir.

Zoramthanga chuan Mizo National Front Party, General Headquarter aiawha thu a thawnah hian an pawm lohna point panga a tarlang :

1. Uniform Civil Code (UCC) hi Article 44 of the Indian Constitution anga India ram chhunga hman tum chungchanga hi NDA sawrkarna hnuaiah hun rei tak atanga hman tumna a lo awm tawh tih Dt 14/6/2023-a Law Commission of India in Public Notice a tihchhuah atang khan a hmuh theih a ni.

2. Hemi chungchang hi Mizoram State Legislative Assembly-ah February 14, 2023 khan sawiho a lo ni tawh a, hemi kaihhnawiha Home Minister-in Official Resolution a putluh angin he House hian India ram chhunga UCC hman tumna leh hmalakna chu a dodal tlat tih lungrual takin pawm a ni.

He Resolution ang hian Mizoram State Legislative Assembly chuan an sawiho naah hian UCC hi hman anih chuan ram pumah lungrual lohna thlen thei a nih thu te, sakhua leh tihdan phung te, hnam dan leh sakhua anga mi tlem zawk te kalphung hman thin dan Mizo ngei pawhin kan hman thin te titawp vek thei a nih thu te tarlang a ni a. UCC hman hi kan duh lo a ni.

3. Tun hunah hian ka sawi duh chu MNF Party chu NEDA Member a nih ang leh NDA sawrkar hmalakna te mipui tam zawk leh mi hnuaihnung zawk te tana tha tur a nih chuan thlawptu a ni. Amaherawhchu MNF Party chuan UCC hman hi India rama hnam tlem zawk, a bik takin Mizo te anga tan chuan a him kan ti lo a, a chunga kan tarlan tawh ang hian Official Resolution kan lo siam tawh a ni.

4. MNF Party chuan Memorundum of Settlement chu Government of India nen June 30, 2023 khan ziakin Constitution (53rd ammendment) Act, 1986 hnuaiah Union Parliament chuan a pawm a, Article 371-G of the Constitution of India behchhanin Memorundum of Settlement hi ziah a ni a, hetah hian a hnuaia mi ang hian tarlan a ni.

"India Parliament chu Mizo te nundan phung leh Sakhua naah a inrawlh thiang lo ang, Mizo Costomary Law kalphung thlak danglam chungchangah te, Mizo Customary Law bikah hian thuneihna a a neih lo ang, Mizoram chhunga In hmun leh ram inhlan chhawn leh neitu nihna chungchangah Mizoram Legislative thu tlukna a nih loh chuan Parliament thutlukna in a khawih thei lo a ni, tih a chuang a ni."

India ram chhunga UCC hman tuma chhawpchhuah a nih chiah khan Mizo ten sakhua leh tih dan phung a neih te, customary/personal law a neih, a bik taka Constitution-in a humhimna nen a inkalh vek a ni. Chuvangin central-a fawng vuantu NDA sawrkarin Public Notice a tichhuah a, rawtna a siam ang hi pawm thei a ni lo.

Zoramthanga chuan, "A nihna takah chuan MNF Party of Mizoram chuan zah tak chuangin Union Parliament in India ram puma UCC hman tura rawtna a siam hi a pawm thei lo a ni," a ti.