ZALEN September 3, 2023 : MNF thalai vice president Zodinpuia’n MNF-ten ralthuam an dah that hun chhung tur chu kumkhua atan a ni lo tih sawiin, India rama Mizo hnam a him chhung atan leh an thutiama India-a rinawm chhung atan chauh a nih thu a sawi.

Nimina Aizawl Press Club-a thuthar thehdarhtute an kawmnaah MNF thalai vice president chuan MNF chu Mizo hnam a boral lohna tura Mizo nationalism min zirtirtu leh tun thlenga ram leh hnam hmangaihna thangtharten kan la neih chhan chu MNF chi tuh rah niin a sawi.

“Hnam dang awpbehna lak atanga Zoram zalenna sual ngam awm chhun chu MNF a ni a, MNF hian zalenna sual lo ta se kan chhehvel a state dangte ang bawkin Mizote hi kan ram, Mizoramah ngei hian chim ral kan nih tawh ang,” ti bawkin, ram leh hnam hmasawnna tura pawimawh infrastructure development din kawngah MNF aia hnathawk tha an awm lo a, Mizoram chhunga hmasawnna lian zawng zawng chu MNF kutchhuak deuh vek niin a sawi.

Chief minister leh a kaihhruai MNF sawrkarin huaisen taka sawrkar laipui thu a hnial ngam vangin Myanmar, Bangladesh leh Manipur atanga kan unaute, vawiin thlengin Mizoramah thlamuang takin an awm thei niin a sawi bawk.

Mizoram ramri humhalhna kawngah MNF aia huaisen an awm lo tih sawi bawkin, Zodinpuia chuan, “Assam nen ramri buai kan neih chungchangah MNF chuan silai a hmet puak ngam mai a, Congress sawrkar hnuaia Mizoram tlawm zawka tang thin kha MNF sawrkar hnuaiah chuan vawiin thlengin kan thenawm state-ten ramri chungchangah min tibuai ngam tawh lo,” a ti bawk.

MNYF VP thusawi thenkhat :

Party dang hruaitu leh CM candidate atana an vawrh chhuahho zawng zawng hi MNF a lo awm hmasa tawh vek an ni. MNF hruaitute erawh political party dangah an la zuang lawr ve ngai lo. 

Mizoten hnam hla pakhat chauh kan nei a, chu chu ‘Jana Gana Mana’ ni lovin, ‘Ro min relsak ang che’ tih a ni.

Mizorama sawrkarna chan ringawt aiin a himna hi MNF chuan a dah pawimawh ber a ni. 

India rorelna sang ber pawhin a tihchet theih loh va Mizo hnam nun (culture) leh sakhua lo humhimtu chu MNF a ni.