Aizawl June 8, 2023 : MNF Thalai chuan ram leh hnam humhim turin MNF sawrkar aia huaisen leh chak Mizoram in a la nei lo, an ti a. Manipur a Zohnahthlak ten inrelbawlna hran (separate administration) an phut chu MNF chuan an thlawp thu sawiin Chief Minister Zoramthanga chu Zohnahthlak te tana ding thin an ti a, an chhuang tih an sawi bawk.

Vawiina thuthar thehdartu te an kawmnaah MNYF Vice President Zodinpuia chuan, "Mizoram leh a chhehvel a Zohnahthlak unaute’n hun harsa an hmachhawn lai hian Chief Minister Zoramthanga leh MNF sawrkar chu Zoram mipui leh kan unaute tan nghet takin a ding a, hniak khat pawhin a la hnungtawlh lo a ni. Manipur Zohnahthlak tana Chief Minister Pu Zoramthanga hmalakna ngaitheilo a Meitei thenkhatin Pu Zoramthanga thlalak/lim an hal hi MNYF Headquarters chuan Chief Minister Pu Zoramthanga ropui zia an tarlan na ah kan ngai a. Zofate tana Pa nih tling MNF President leh Chief Minister Pu Zoramthanga kan nei hi MNYF Headquarters’ chuan a chhuang tak zet a ni," a ti. Chief Minister Zoramthanga huaisenna avangin Assam lamin hunrei tak an lo ta neih tawh thin ram te pawh harsatna awm lovin Mizoram chuan an cheibawl chho theih phah niin an sawi bawk.

Manipur state a Zohnahthlak unaute’n inrelbawlna hran (separate administration) an phut hi MNF chuan a thlawp.

Manipur state a cheng zofate leh zohnahthlak MLA 10 ten inrelbawlna hran phut a hma an lakna hi MNF chuan a thlawp a, kan unaute himna tur hian theihtawpin ke a pen zel dawn a ni. Hetihlai hian Manipur Assembly-a Zohnahthlak MLA 10 te hnenah Manipur CM ruahmanna in show cause notice pek an ni a. Manipur a kan Zohnahthlak MLA 10 te pawh an thu ah nghet taka dingzel turin MNYF chuan kan beisei a, a kiangah MNF chu a dingreng dawn a ni. 

Meitei pawl thenkhat, Coordination Committee on Manipur Integrity (COCOMI) te chuan khawvel hriat a kan zohnahthlak unaute hmai tihbalhna tur leh, Manipur-a Meitei mipui chetdan tenawm tak hliahkhuhna tura National war against Chin-Kuki Narco Terrorist an puang chu MNYF chuan nuihzathlak a ti a. Manipur buaina chinfel a nih thuai theihnan inrelbawlna hran (separate administration) pe thuai turin sawrkar laipui pawh MNYF chuan an beisei a ni.