Aizawl: Mizoram Pradesh Congress Committee chuan Mizo hnam party inti te sawrkarna hnuaiah hnamdang contractor an langsar hle niin an sawi.

Nimin khan Aizawl Press Club-ah chanchinbumite kawmin MPCC thupuangtu Dr. Lalianchhunga chuan, "Mizoram sum leh pai enkawlna kawnga MNF sawrkar talbuai dan hi a thuk tawh em a, kum hnih-khat lek chhunga siamthat mai theih tawh loh tur khawpa dinhmun chhiaa a din tawh avangin an dinhmun hrethiam chin MNF Minister-te chuan finance chungchang engmah an sawi duh tawh lo a. Minister leh MLA tam zawk chu an ngawi thup tawh a ni," a ti. MNF sawrkarah duhsak zual te tan a vur kum a thleng mek zel nia sawiin, "MNF sawrkarin COVID-19 chhuanlama pawisa a harsatna a tawh thu a tlangaupui mek laiin an duhsak zawngte a ruka an lo vur nasat zia chiang takin a lang chho zel a. MNF Party worker-te leh Contractor tam zawkin an hnathawhna bill an lak theih loh lai te, PMGSY contractor tam zawk ten bill vaibelchhe 200 chuang an lak theih loh avanga an hnathawh pawh an chhunzawm theih loh laiin an duhsak zawng Contractor-te contract pek leh bill pek kawngah chuan harsatna an tawk miah lo a ni," a ti bawk.

MNF chuan hnamdang contractor te an duhsak nia sawiin, "MNF Party sawrkarna hnuaia ni khata Bill lehlan thei zinga che thei ber chu SLT Infracon Pvt. Ltd, Silchar a ni a, an ni hian bill 9 lai chu awlsam takin an thehluh ni la lain an la nghal thei a. Vai company bawk Ratna Infra, Hyderabad leh M/S Bhavya Construction, Silchar-te pawhin an bill 4 ve ve ni khatah an lehlan thei . Kamrul-a pawhin Treasury-ah bill 3 a lehlan pui thei a, RTI chhanna atanga a lan danin Kamrul-a bill hrim hrim hi Treasury-ah thla khat aia rei a tang ve ngai meuh lo bawk a ni," a ti a. "Sawrkar hnathawk leh mipui nawlpuite mamawh em em bill pek aiin Contractor mi tlemte, an duhsak zawngte bill pek an awlsam zawk tlat hi mipui an zah loh zia tilangtu a ni," a ti bawk.