ZALEN August 10, 2023 : Mizo National Youth Front (MNYF) chuan Congress party chu Mizoram Kohhran Hruaitute Committee (MKHC) leh Chief Minister Zoramthanga te inkawmna tihbuai tumah an puh a, August ni 9, 2023-a Chief Minister gate bul a tharum an thawh chu pawi an tih thu an sawi, Mizoram a thil thleng ngailo sakhaw rawngbawltute zahlohna a nih avangin Mizoram mipui hma a ngaihdam dil ngei turin Congress party an phut.

MNYF chuan Mizoram Kohhran Hruaitu Committee (MKHC) leh Chief Minister Zoramthanga te hian chawhma dar 11 atangin inkawm hona an nei a, hemi hma zingah khan Congress party chuan CM Bunglow tual ah punkhawm an tum tih hria in, Parliament Fur thutkhawm neih mek a, ‘No Confidence Motion,’ put luh chungchanga MNF leh Mizoram sawrkar dinna pawh Chief Minister office atangin hrilhfiah an ni, an ti. MKHC nen inkawmhona neih a nih dawn avangin punkhawmna pawh neilo tura ngen an ni, an ti.  

MNF Thalai chuan Congress party hruaitute ngen an ni chunga sakhaw rawngbawltute leh Chief Minister inkawmna tihbuai tumin punkhawm an huaihawt lui leh Mizoram Synod Moderator haw tur pawh hunrei tak Chief Minister gate bul ah Congress party hruaitute hian an dangbet a ni, an ti. "Kristian ram ah kan sakhaw rawngbawltute ti thlabar zawng leh tihbuai tuma tharum thawhna hi vawikhat mah thleng tawhlo turin MNYF chuan kan duh a, Congress party pawh MKHC leh Mizoram mipui hma a ngaihdam dil ngei turin kan phut a ni," an ti.