ZALEN May 31, 2024 : MNF thalai chuan tunlaiin chhiat tâwkte leh mi mangangte tanpuia mipui an buai laiin ZPM Party chuan Press Release siamin dawtin an sawrkar an lo fak leh hman tawh an ti.

MNYF chuan ZPM-in an thuchhuah an siamah, "Mizoram sawrkar pian hnua la awm ngailo nunna chante ralna atâna cheng nuai li (Ex-gratia) a ruahman hi ropui a tiin thlamuanthlak a ti a ni,” an ti a, hei dawt a ni an ti. "Ramin chhiat a tawh lai leh mitthi te ràlna zât lehzela ZPM party-in dâwt an puang duh hi a Mizo lo kan ti a, pawi kan ti takzet a ni," an ti.

MNF Thalai chuan, Chhiat tawka mitthite ràlna (ex-gratia) hi sawrkar hmasa hunlai pawhin vawi engemawzat cheng nuai li (Rs 4 lakh) zelin Mizoram sawrkarin a lo pe tawh thin a, central sawrkar sum SDRF atanga pek niin a rate awm sa vek a ni," an ti.

"Congress leh MNF sawrkar hmasate chuan India ram state dangah pawh an tih dan angin instalment ni lovin tumkhatah cheng nuai li (Rs.4 lakh) zelin mitthite an râl thin a. Tuna ZPM sawrkar chiah hi mitthi ralna instalment-a pe awmchhun ni a hriat a ni. Tihdan phung pangngai bawhchhiaa central sawrkarin mithi ràlna atâna sum a dah sa, a puma pe lova a chanve chauha an pek avàngin ZPM Party hian mipui hmaah ngaihdam dil nghal se, an pek kim loh 50% pawh hi pe tla nghal rawh se," an ti bawk.

Congress sawrkar leh MNF sawrkarin cheng nuai 4 zela a full-a an pe thin ang khan ZPM Sawrkar hian mithi ralna hi pe tla ve nghal rawh se, an ti zui bawk.