Aizawl August 7, 2023 : MNF Thalai chuan thuchhuah siamin Hnam anga tanrual a hun lai leh inthlawp tawn a tul laiin ZPM Thalai chuan Rajya Sabha MP K. Vanlalvena chu dik lo takin an puh an ti a, Forest Conservation (Amendment) Bill, 2023 Parliament-a pass a nih hma khan MP hi Manipur buaina chungchang sawi a rem loh avangin House a chhuahsan tawh niin an sawi.

MNF Thalai chuan, "Forest Conservation (Amendment) Bill, 2023 sawi ho a nih hma hian Chairman-in Manipur chungchang sawi a rem tih loh avangin opposition MP te chuan House an chhuahsan vek tawh a. He bill hi tlang ngei tur a ni tawh a, MP Pu K Vanlalvena hian he bill pass puitu nih a duh loh avangin House hi a chhuahsan ve leh a. He bill a thlawp loh thu leh a thlawp loh chhan te tarlangin thuchhuah a siam tawh bawk a ni," an ti. K. Vanlalvena hian "Forest Conversation (Amendment) Bill, 2023 hi ka duh loh chhan bulpui ber chu forest thuneihna chhuhsak thenna a nih vang a ni," a ti, niin thuchhuah an siamah hian an tarlang.

Vawiin (August 7, 2023)-a Manipur a Zofate laka Meitei ten tharum an thawh a chungchang sawihona atana House Adjourned dilna Rule 267 pawh MP K. Vanlalvena hian a thehlut a ni, an ti bawk.

August ni 5, 2023 (Inrinni) khan Zoram People's Movement (ZPM) Thalai Headquarters chuan Forest Conservation (Amendment) Bill, 2023 sawi hona ah Mizoram MP(Rajya Sabha) K Vanlalvena chu vote thlâk ngam lo leh bill duh lohna lantir duh lova tlanchhia ah an puh a. ZPM workers te chuan social media ah K. Vanlalvena hi Manipur chungchanga House-a suspension of business notice theh lut lo, mahni thutiama ding lo tiin thu dik lo ti tawh bawk a ni.