Aizawl: Mizo National Youth Front chuan Chief Minister Zoramthanga hmalakna avangin Mizoramin hmasawnna hmelthar a hmu chho zel tih sawiin Mizoram-ah kawngpui thar sialna tur cheng vaibelchhe 6,664 zet mai pawm a nih thu Ministry of Road Transport and Highways changtu Minister-in a puang chu lawmawm an ti hle tih an sawi a. Project hlawhtlin theihna tura CM Zoramthanga hmalakna leh thawhrimna an chhuang tak zet tih an sawi bawk.

Nimina thuchhuah an siamah MNYF chuan Mizorama kawngpui thar siamna tur hi Kilometer 204 zeta sei a ni dawn a. Hemi chhungah hian Aizawl traffic jam tih ziaawm theihna tura Aizawl khawpui helna leh leiverh (tunnel) siamna tur vaibelchhe 3000 senna turte, Silchar leh Aizawl inkalpawhna tha zawk vaibelchhe 1400 senga siamna tur te, Hmartlangdunga cheng mipuite tan “Zoram kawtchhuah thar” siamna tur vaibelchhe 1500 zet senna turte bakah; Zorinpui leh Longmasu inkalpawhna siamna atan cheng vaibelchhe 764 senna turte a tel niin an sawi a. Covid-19 hripui leng avanga ram sum leh pai dinhmun nasa taka a tlakhniam lai leh, hunrei tak chhung hripui lengin Mizoram min tuam lai pawha Mizoram hmasawnna tura rim taka hnathawk rengtu Chief Minister kan nei hi MNF Thalaite chuan kan chhuangin ropui kan ti takzet a. Mizoram in hun harsa kan tawh laia ram mipuite tana Pa nih tling Chief Minister kan nei hi kan vannei hle a ni, an ti bawk.