Aizawl: MNF Thalai chuan March ni 5 & 6, 2020 chhunga neih zawh tak, Chapchar Kut puala Vanapa Hall, Aizawl-a Art Exhibition neih zawh takah lemziak pakhat, an President Zoramthanga zahawmna tibawrhbang thei tur lemziak pho chhuah a ni chu pawi an ti a, an rilru a na hle tih sawiin hetiang thil hi thleng nawn tawh lo se an duh tih an sawi.

Nimina thuchhuah an siamah MNYF chuan exhibition-ah hian an party President, Chief Minister ni bawk Zoramthanga lem chu mite ngaih dan hruai kawi theih tura ziaka pho lan a ni tiin mi dangte deusawhna leh cheksawlhna lam hawia thil tih nia an ngaih avangin pawm harsa an ti hle niin an sawi.

‘Eng political party leader pawh ni se, tuna mite bak hi Mizoten kan nei chuang lo va, chuvangin mimal taka inbeih te hi tha kan ti lo va, an zahawmna humhimsak kan duh a ni tih hi kan dinna a la ni reng a ni’ an ti a. ‘Lem ziaktu te, thu ziaktute, mi tin mai hian hian kan ngaihtuahna leh suangtuahna pho chhuak turin zalenna thui tak nei mah ila, kan zalenna neih hi mi dangte rilru natna tur leh, mi thinurna tichhuak lo tur zawnga kan hman thiam a pawimawh hle a, heng kan zalenna hi fimkhur taka hmang thin turin MNF Thalai chuan mi tinte kan ngen a ni’ an ti bawk