Aizawl: MNF Thalai chuan zu do kawnga tlawmngai pawla tawnhriat tha tak nei, zu duh lotu kohhran mi tak Excise Minister Dr. K. Beichhua kan nei hi a vanneihthlak kan ti a, Minister leh a hote'n hun rei lote chhunga zu khuahkhirhna dan tha tak an rawn duang chhuak thei hi kan chhuang hle a ni, an ti.
Nimina thuchhuah an siamah MNYF chuan, “MNF sawrkar chuan MLA inthlan hmaa a lo aupui tawh angin, zu khap a nih theih nan theihtawpin hma a la nghal a. December ni 15, 2018-a sawrkar thar lakluh atanga a ni thumna, December ni 18, 2018-a Cabinet Meeting chuan PSU hrang hrang MAMCO, MIFCO leh ZIDCO bakah police department zu zawrhna hrang hrangte chu a titawp nghal a, Krismas leh kumthar vuakvet chu dry day-ah puangin zu zawrh chhuah a khap.
“Congress sawrkarin zu a zawrhtirte hi March ni 31, 2019 thleng zawrh phalna a lo pek tawh avang leh zu zawrh duhtute'n court hiala thubuai te an put luh tak avangin zu zawrh chu tihtawp nghal bur a ni thei ta lo,” tiin, “March thlaa Assembly Session neih zawh takah zu khuahkhirhna dan Mizoram Liquor Prohibition bill chu pass a lo ni ta a, Lok Sabha MP inthlan avangin notification tih chhuah hman a ni lo va, Congress sawrkar zu zawrh kal zel hi MNF sawrkar kutah a tla ta lo thei lo va, MNF Thalai chuan zu zawrh duh lotu Mizoram mipuite hriatthiamna kan ngen a ni. Lok Sabha MP inthlan avanga Model Code of Conduct-in a phuar loh chinah dan angin zu a khuahkhirh nghal dawn,” tiin thuchhuah an siam.