Aizawl August 19, 2024 : MNYF Hqrs leh MPYCC chuan Kalphung thar sawrkâra a meizang hlaptu leh thil tha duh vànga danglamna thlen tuma kalphung thar lehkhabu 'Change' tih hial lo ti chhuaktu Home Minister meuhin mi rethei leh harsa zawkte tâna thu hriat nuam lo leh dengkhawng tak a ti chhuak duh hi an ngai thu takin pawi an ti.

Party pahnih chuan, "Congress sawrkar laia sak BSUP Edenthar, Rangvamual, Lawipu, Durtlang-ah te hian chenna in leh lo nei lo mi harsa zawkte tân, duhsak bik nei lovin a remchan dàn ang zela luahtir an ni thin a. MNF sawrkar hun chhung pawhin chu chu thil kal dàn phung a ni."

"Inthlan dawn hnaiha hetianga midang ti thlabâr leh rikrap zawnga Home Minister-in a nihna hmang sual a, midang a vau bet ta mai hian a bial chhung leh AMC bial 6-na mipuite a ngaihnepzia a lantîr a, hun kal tawhah hetianga invauna leh thu thinthawng hi hriat tur a awm ngai lo. Lungmuang tak leh thin thia BSUP luahtute an awm laia anmahni ti thlabâr thei thu hriat tur a awm ta mai hi a ngaihthiamawm loh takzet a ni," an ti.

Home Minister K. Sapdanga hi Zoram mipui, a bial chhung North-III leh BSUP, Edenthar-a chengte beng hriatah By-Election awm hma ngeia ngaihdam dil turin an phut a. Inthlannaa vote duh luat avànga thuneihna hmanga invauna rawngkai leh thil intihluihtîr tumna ang chi hi thleng tawh lo se MNYF leh MPYCC chuan an duh a ni.

Hei hi BSUP, Edenthar venga chengte laka chungtlâkna leh inpalzutna a ni a. Home Minister K. Sapdanga hian Model Code of Conduct a kalh mai pawh a ni lo, midang rikrapna leh vauna (Intimidation) a tel avangin Representation of Peoples Act,1951 dan kalh tlat a ni.

** August ni 22, 2024-a Aizawl Municipal Corporation (AMC) Ward-VI, By-Election neihna turah ZPM Working President leh Home Minister ni mêk BSUP enkawltu UD&PA Minister ni bawk K. Sapdanga (Mobile - 9436140430) chuan a bial Aizawl North-III huamchhûnga By-Election neihna tur veng pakhat Edenthar ZPM WhatsApp group-ah, "BSUP-ah Pu Thangtea leh Chuaungova an kal fo an ti a, campaign tawp niah Chiang fek fawkin, 'In vote thlakna kan hre vek dawn, kar leh lawkah tutenge luah zui zel tlak kan lo thlir nawn ang' tih vel mai mai a tawk viau. 'Opposition party enkawl nge in duh ruling Party enkawl?' te zu ti mai mai ila," tiin thu a thawn (post) a ni.