Aizawl: Champhai South Assembly Constituency huamchhunga Model Village atana thlan Tlangsam khuaah Zirtawpni khan Model Village chungchang inhrilhhriatna leh hmalak zel dan tur Champhai district Bawrhsap Maria C.T Zuali hovin neih a ni.

Bawrhsap Maria C.T Zuali chuan Covid-19 hrileng leh district chhunga lirnghing avangin ruahmanna neih fel a har thu a sawi a, model nih avangin a tir atangin eng-kim a fel nghal vek bik lova, model hlawhtling ni tur ten kawng engkima training an la hmasa thin angin Model Village ni turin theihtawp chhuaha inzir a ngaih thu leh khawdang te tana entawn tham ni tur khawpa lungrual taka thawhho a tul thu a sawi. Tlangsam khaw mipui 95% vel kut hnathawka eizawngtute an nih avangin Agriculture lamah pawh theihtawp chhuah a nih tur thusawiin Dept. hrang hrang ten Model Village an vilzui tur thu a sawi a. Hriselna kawngah te, tui thianghlim pek kawngah te, zirna kawngah te, thing leh mau humhalh leh a pawi-mawhna zir kawngah te bakah infiamna leh insawizawina kawngah leh hmasawnna hrang hrangah theihtawp chhuahpui an nih tur thu a sawi bawk.

Tlangsam VCP HL Malsawma chuan Model Village-a thlangtu bialtu MLA TJ Lalnuntluanga chungah Tlangsam khawtlang an lawm thu a sawi a, Model Village-a a taka kalpui a nih theihna tura sawrkar Dept. hrang hrang hotu ten a hmun ngeia tlawha an zirtir chu lawmthu hrilhin he hun hi a khar a ni.

Tlangsam khua ah hian in 537 awmin mihring 2137 an cheng mek a ni.