Magnitude 6.8-a nain Morocco laili a sawi a, mi 632 vel thi an hre tawh tih an ram interior ministry chuan a puang.

A intanna hi Marrakesh chhimthlang lam km 71 vela hla, High Atlas Mountains-ah niin lei hnuai km 18.5 atanga intan niin US Geological Survey chuan a tar lang.

Lir a nghin hun hi an ram sanaa Zirtawpni zan dar 11:11 (India-a Inrinni zing dar 3:41) a ni a. A hnu minute 19-ah magnitude 4.9-a nain a sawi leh bawk.

Thi tam ber hi Marrakesh-ah leh chhim lamah a nih thu ministry chuan a sawi.

“Thu kan dawn tawh chinah chuan al-Haouz, Marrakesh, Ouarzazate, Azilal, Chichaoua leh Taroudant province leh khawpuiah mi 632 an thi,” an ti a, mi 153 hliam tuar awmin damdawi inah dah an ni.

X-a video tar lanah chuan in chhia te, a nghing leh a them khawlaia tla darh te hmuh tur a awm a. Mipuite khawlaia chiai taka an tlanchhia leh thil khu chum chum a lang bawk.

Marrakesh-a khawpui hlui zawkah chuan in tam tak a chim niin mi cheng pakhatin Reuters news agency a hrilh a. X-a video tam takah in chimte  hmuh tur a awm.

Tual chhung mite chuan nghing nawn na tak tak a la thlen theih avangin ina let leh aiin khawlaia riah rih an thlang hlawm.

Mipa pakhat chuan khawpui hlui zawk chu ‘nasa taka sawi’ a nih thu leh ‘inte chu a che dual dual’ niin a sawi.

“Mipuite kan chiai hle a. Naupang an tap a, nu leh pate pawh an mangangin an phili hle,” tiin Abdelhak El Amrani chuan AFP agency a hrilh.

Power leh phone line pawh minute 10 chhung vel a chhe bawk.

AFP hian chhungkaw pakhat chu an in chimah an la tang niin a sawi a, Marrakesh-ah hian mi tam tak damdawi inah dah luh an ni tih a tar lang bawk.

Lirnghing a intanna lai hi High Atlas Mountains-a hmun kilkhawr tak a ni a, a lei a nem hle bawk a. A insawi hi an a intanna atanga km 350-a hla, an khawpui, Rabat-ah pawh hriat niin Casablanca leh Essaouira pawh a sawi.

A intanna lai tlangrama in dingte chu ding zui an awm lo va, thi leh hliam an awm leh awm loh erawh a la hriat theih loh thung.

Lir a nghin atanga darkar hnih hnu velah Morocco-ah hian ni a chhuak a, hetah hian thil chhia leh thi pawh kimchang zawka hriat theih a nih beisei a ni.

A nghinna lai hmun vel hi in upa tak tak tamna a ni a, thenkhat phei chu hmanlai hmun hlui niin hlu tak tak a ni hlawm.

Marrakesh pawh hi hman lai khua a ni a, khuazin tamna a ni a, heng khualzinte hian an tuar em tih hlauhthawnna a lian nghal hle bawk.

Indian Prime Minister Narendra Modi chuan Morocco-a lirnghing avanga nunna chân tam tak an awm chu ‘pawi a ti tak zet’ tih a sawi a, an ram pawh a ngaihtuahin an tawrhna a hriatpui tih a sawi.

“An duh tak chântute ka tawrhpui tak zet a ni,” tiin social network X-ah a tar lang a. “Hliam tuarte pawh rang taka an dam chhuah leh ka duhsak a, India pawh an hun harsaah hian Morocco pui turin a inpeih reng,” a ti bawk.

German Chancellor Olaf Scholz pawhin Indian hruaitu ang bawk hian an tawrhna a tawrhpui tak zet tih a sawi.

X-ah Chancellor Scholz chuan pawi a tih thu leh a tuartute chu a rilrua a tawrhpui thu a sawi.

“He khuarel chhiatna thlenga tuar zawng zawngte kan lainat takzet a ni,” tiin Scholz-a hian Delhi-a G20 Summit a telna atangin a puang a ni.