Lirnghing na takin a sawi, Morocco-a thi chu mi 2,000 chuang an ni tawh a, hetiang zat vel bawk hi hliam tuar an awm.

Interior ministry chuan hliam na zual mi 1,400 chuang an awm thu leh thi leh hliam hi Marrakesh chhim lam hret province-ah te an tam zual thu an sawi.

King Mohammed VI chuan ram pumah ni thum sun an nih tur thu a puang a. Hetih rual hian a dam chhuakte awmna tur, ei leh in tur leh an mamawh dang pek chhuahna tur thu a pe bawk.

A zan hnih nan Inrinni zan khan mi tam tak pawnah an riak leh bawk.

Zirtawpni zan khan magnitude 6.8-a nain Marrakesh leh bul hnai hmun tam tak a sawi a. Tlangram khaw kilkhawr thenkhat chu an khaw puma chhia an ni tih sawi a awm nghe nghe.

Lirnghing hi khualzinte tlawh nasat hmun, world heritage site, Marrakesh khawpui atanga chhimthlang lam km 71-a hla, High Atlas Mountains-ah a ni.

A nghing hi an khawpui, km 350 vela hla, Rabat bakah Casablanca, Agadir leh Essaouira-ah pawh hriat phak a ni.

Interior ministry chuan Al Haouz province-ah thi an tam ber a, Taroudant province-in an dawt tih a puang a. Marrakesh-ah chuan an tlem deuh va; mahse, Unesco-in a hum mek an khawpui hlui zawkah erawh thil chhia a tam hle thung.

Tlangram khuaa leirawhchan, lung leh thinga sak in tam zawkte chu chim ngei tura ngaih a ni a; mahse, an awmna a kilkhawr em avangin chhiatna thlen dan kimchang hre tur chuan hun a la ngai deuh dawn thung.

Royal palace chuan an hnam puanzarte chu sorkar hmun zawng zawngah thite sun nan ni thum chhung a ngul chanvea zar turin thu a chhuah.

Lal hian sipaite pawh chhanchhuah hna thawktute pui turin a ti a, Moroccan-te chu thisen mamawhte tan thisen pe turin a ngen bawk.

Tun tum hi kum 1960-a magnitude 6.7-a nain Agadir-a sawi tuma mi 12,000 chuang an thih hnua Morocco-in lirnghing an tawrh nat leh ber a ni.

A nat zawngah chuan Zirtawpnia nghing hi kum za chuang zet hnua an tawrh nat ber tum a ni thung.

UN chuan chhanchhuah hna thawhnaah puih an duh a nih chuan an inpeih reng tih Morocco sorkar a hriattir tawh a. Hetiang bawk hian Spain, France leh Israel te pawhin an inring reng tih an sawi.

An thenawm, Algeria ram pawh kum eng emaw zat Morocco nen intithiam lo tawh mah se an chung boruak chu puihna thil thawnna atan thlawhna tan a hawng mek bawk.