Kum 60 chuang hnua Morocco-in lirnghing a tawrh nat berah mi 2,800 chuang thi an awm tawh a. Hetih lai hian tlangram hmun kilkhawra chhanchhuah hna thawktute chuan hun a liam tam deuh tawh avangin dama hmuh an neih beiseina an nei chau tan ta hle.

Zirtawpni zana Marakesh chhimthlang lam km 72 vela hla, High Atlas Mountains-a intan magnitude 6.8-a na lirnghingah hian mi zawn hna chu Spain, United Kingdom leh Qatar ram atangin Moroccan-te an pui mek.

Sorkar television chuan mi 2,862 thi an awm tawh thu leh mi 2,562-in hliam an tawrh thu a puang a. Chhanchhuah hna thawktute chuan leia siam hmanlai tih dan zuia in sakte chu a chim nasa a, tunah chuan in chim kara tang dama lak chhuah tur an vângin beiseina a chau tan hle tih an sawi.

Thingtlang hmun kilkhawr tak, Imi N’Tala khuaa thil thleng pakhat, Bomberos Unidos Sin Fronteras (United Firefighters Without Borders)-a thawk Spanish rescuer Antonio Nogales-a’n video a lakah chuan awihpang taka in chim tlusawp karah mipa leh ui ten bungrua leh thil dang an hai lai a lang.

“A sawp dan hi nasa tak a ni,” tiin Nogales chuan a sawi a, an chhiat dan chu thua sawi fiah mai a harsa niin a sawi a. “In ding pakhat mah a awm tawh lo,” a ti.

Chhiatna nasa tak thleng karah hian chhanchhuah hna thawktute hian ui nen dam chhuak an awm hlauh takin tiin an dap mek zel tih a sawi.

“Ni a liam zel a, chhanchhuah kan neih zel ka beisei a. In chim karah hian mi an la awm ngei kan ring a, a karah boruak hip tur a la awm a, kan beiseina hi a la tawp mai dawn lo,” a ti.

PUIHNA MAMAWH
Dam chhuak thenkhat chuan mi zawn leh chhanchhuah hna thawk chu a muang mah mah niin an sawi hlawm a, hetih lai hian Thawhtanni atang khan tlemin hna a chak ta deuh thung a. Thawhtanni zan thleng khan hmun eng emaw zatah puan in kaihin a zan li nan mi eng emaw zat chu khawlaiah an riak leh hlawm.

Moroccan chanchinbu, 2M-in video an lakah chuan lirnghing a intanna chhehvelah sipai helicopter a thlawk a, ni tin mamawh eng eng emaw a thlak tih a lang.

Lirnghingin a sawi nat lai hmunte hi hmun kilkhawr, thlen a harsatna hmun a ni a, thuneitute pawhin tun thlengin chin hriat lohva awm zat pawh an la sawi hleithei lo.

Morocco-a hman lai hmun hluite pawh lirnghing hian a tichhe nasa a. Marrakesh khawpui hlui zawk, UNESCO World Heritage Site pawh a tichhe nasa hle a. Kum zabi 12-na laia sak, Tinmel Mosque pawh a chhe nual bawk.

Lirnghing intanna bul lawka awm, mi 15 an thihna thingtlang kilkhawr tak, Tinmel-a chengte chuan ei tur, damdawi leh tui an intawm tlang tih an sawi a. Tlang sang hmun vawt taka an awm avangin zanah puan in leh kawmawl an mamawh hle tih an sawi bawk.

Ni 15 mi lek naute pawmtu nu chuan a fa tan bawnghnute leh damdawi a mamawh tak zet thu a sawi.

Tun tum lirnghingah hi naupang 1,00,000 velin an tuar ngei nia hriat a ni.

Hetih lai hian United Nations Children’s Agency chuan naupang thi zat leh hliam zat chiah an la hre thei lo va, chhinchhiahna hnuhnung ber, kum 2022-a tihchhuahah khan Morocco-a  mihring hmun thuma thena hmun khat chu naupang nia ngaih a ni.

SORKAR HMALAKNA
Tun tum hi Africa khawmualpui hmar lam ramin kum 1960 hnua lirnghing a tawrh nat ber niin kha mi tum khan mi 12,000 vel an thi nia ngaih a ni a. A nghin nat zawngah chuan kum 1900 hnua a nat ber tum niin United States Geological Survey chuan a sawi.

Sorkar a che chak tawk lo nia sawi mek karah Pathiannia sorkar thupuangtu, Mustapha Baytas-a’n TV-a thuchah a sawiah chuan sorkar chu a hmunah chein theihtawp a chhuah niin a sawi ve thung.

Sipaiten mi zawn leh chhanchhuah hna thawktute puiin tui in tur an pe a, ei tur, puan in leh kawmawl an sem bawk.

Chhiatna an tawh hnuah King Mohammed VI chuan mipui hnenah engmah a la sawi lo va. Prime Minister Aziz Akhannouch chuan sorkarin a tuartute chu zangnadawmna a pek tur thu a puang tawh a; mahse, engtin chiah nge an kalpui dawn tih a sawi lo thung.

Morocco chuan Spain leh UK atanga puih an inhuamna chu a ‘aw’ tawh a, ram hnihte hian search-and-rescue specialist rualin ui fing an thawn tawh a. United Arab Emirates leh Qatar pawhin Pathianni khan search-and-rescue team an thawn bawk.

Hetih lai hian an thenawma an kawmngeih loh tak, Algeria pawhin puih a inhuam thu a sawi a, mipui pawhin an pui duh tih puan a ni bawk.

European Commission pawhin chhawmdawl hna thawhna atan Moroccco hnenah Euro maktaduai khat a pe dawn tih a puang bawk.

Sorkar TV chuan ram dang atanga chhawmdawlna leh puihna pek an tum an ‘aw’ hmain eng nge an mamawh ber leh puih an ngaih dan kimchang hriat an tum hmasa niin an sawi a, chu chu an chian hnuah ram dang atanga puihna chu an pawm dawn tih a puang.