Aizawl: Medical Operational Team on Covid19 chuan hripui leng mek chu nikum lam aiin inkaichhawn a awlsam zawk nia sawiin mipui te chu fimkhur lehzual turin an ngen a. 'Kan fimkhur viau loh chuan nasa takin kan tuar ang a, inenkawlna hmun hma leh hmanruain min daih lo ang a, Mizo hnam tlemte hi kan pul puk mai ang tih a hlauhawm ta hle a ni,' an ti. 

Medical Operational Team on Covid19 chuan a hnuaia mite hi zawm theuh turin mitin an ngen-

1. Tul hle lovah chuan tumah chhuah vah loh tur a ni. Thenawm khawveng leh chhungkhat laina pawh, tul hle loah chuan inlen pawh loh tur a ni.

2. Chhungkaw bil leh thian bila thil tihkhawm pawh insum hram hram rih tur a ni.

3.Chhiatni thatniah pawh, kan laina hnai tak zet zette an nih loh chuan tlawmngaia kal loh hrih zawk hi kan himna tur a ni tih hria ila. Chhungkaw lam pawhin hrethiam zel rih hram hram ang u.

4. Mi zinga awm laiin hmai tuam ngei tur a ni. Tawng laiin tuam that hle zawk tur a ni.

5. Mi dang nena thil kan inpek tawn hma leh zawhah te, thil inkhawih tawm chi kan khawih zawhahte kut tihthianghlim zel tur a ni.

6. Mi dang nen hlam khat tala inhlatin awm hram hram tur a ni.

7. Covid19 vanga thi, uluk taka an ruang sawngbawl tawh hnu lak atangin he hri hi kai a hlauhawm tawh lo a. Mitthi vuinaah invenna thuam famkima inthuam kher a ngai lo a, kan fimkhur dan pangngai hman hi a tawk hle.

8.Sawrkarin inkhuah-khirhna a siam hi inrahbehna ni loin min chhanhim an duh vang a ni a, thuawih tur a ni.

9. Khawtlangin Covid19 veite enkawlna hmun tur (CCCC) siam uar ila, in lama inenkawl a tul hun atan pawh mi tin rilru inhawng zau sa ila, mi tana harsatna siam loin tanpuitu nih i tum ang u.

10. Mi tin, chhung tinin inrenchem nachang hria ila, kan thil neih chhun chhun (ei leh in, invenna etc) hlutin, a daihzai leh daih rei theih dan tur zawng zel ang u.

11. 'Chhuahvah theih loh lai' hi chhungkuaa hlim taka awmho theihna hun tha kan neiah inngai hlauh ila, inkawmngeih nan leh Pathian biak ho nan he hun hi i hmang hlauh ang u. Chhungkuaa inkaidarh an awm nual avangin chhungkuaa awm khawm pawhin fimkhur thiam hle ila. Boruak thawleng tha kan neih nan tukverh leh kawngkhar te hawn uar tur a ni.

12. He hun harsa hi kan paltlang ngei theih nan leh, hlim tak leh zalen taka nun kan hman theih nan engkim tithei Pathian puihna leh thlamuanna dil zel ang u. Hun harsa kan tawh lai hian Pathian hnaih ila, mahni phak tawk theuha mi dang tana malsawmna nih i tum vek ang u.