Aizawl: Reiek tlang kawng siam that tum chungchanga thu kal zelah thutlukna fumfe siam a la ni lo. Kawng awmsa hi Portland Cement Concrete Pavement (PCC) a siam tum chu a duh leh duh loh pawl an awm a, a ngai anga kalpui zui duhten PCC-a siam hi an pawm thei lo.

Aizawl chheh vela hmun tlawh hlawh tak, India ram chhung leh ram pawn atanga khualzin lo kalte pawhin an hmaih meuh loh Reiek-a Zokhua atanga tlang panna hi tunah hian motor kal theih tawk tawk ang a ni a, fur lai phei chuan kal hleih theih pawh a ni lo, hei hi PCC a thawm that tum a ni a; mahse, thenkhatin an remti lo a, ‘natural’ taka enkawl mai chu an duh dan a ni.

May 13 khan Reiek Village Council hmalakna in he khua a, NGO zawng zawng, political party te leh Kohhran pawl hrang hrang bakah prominent citizen te chu kohkhawm an ni a, hemi tum hian Chief Secretary Lalnunmawia Chuaungo leh Minister Robert Romawia te chuan Reiek tlang kawng siam chungchanga hmalak an duh dan te an sawi a, thutlukna erawh engmah siam a ni lo thung.

Tun hnaia chanchinbu pakhatah Reiek VC Vanlalchhuanga chuan an khaw mipui ten kawng hi siam ngei an duh tih tarlan a ni a; mahse, hemi chungchanga ZALEN thudawnna chuan, “Khaw mipui ngaihdan engmah lak a awm lo niin a sawi a, duh anga in sawi hi a dik chiah lo a, khaw chhungah pawh hemi chungchang hi sawi a tam hle,” a ti.

He mi a sawi rual hian, mi tam zawk hian an duh tho thei tih a sawi bawk a, mipui ngaihdan lakkhawm hi eng anga chiaha kalpui tur nge tih erawh a sawi thei lo.

“Official chuan engmah kan hriatpui lo” : Tourism
Reiek tlang chuan hnuai lama inkhuar Tourism department lam chuan hemi chung changah hian engmah thuneihna an neih lem loh thu a sawi a, an tourist sakna pawh hi a nihna takah chuan khawtlang ram a nih thu ZALEN an hrilh a, tlang panna kawngah gate siamte pawh official ang chuan hriatpuina an neih loh thu an sawi. Tuna kawng siam chungchangah pawh hian official ang chuan engmah an hriatpui loh thu an sawi a. Reiek mai ni lo, hmun hrang hrangah a khawtlang hmuna inkhuar an nihna hmunah hmalak a harsat phah thin thu an sawi bawk.