15, July, 2023: Vawiin July ni 15, 2023 khan Zamuang Arecanut Growers' Co-operative Society Ltd. Office ah Mizoram Tripper Drivers & Owners Association, Mizoram Truck Driver Association leh kuhva chingtute an inkawm niin HBKCP thuchhuah chuan a tarlang.

"He dan phalloh kuhva tawlh chungchanga a mawhphurtu lian ber  leh thiam lo ber chu Police hi an ni a, kan Police te hian ram leilung fate hamṭhatna ngaihtuahin, diklo taka thil tite ven dan dik takin hnathawk se, hetiang harsatna kan tawk lovang." an ti bawk.

MTDOA lam chuan dan lova kuhva ro tawlh ti tawp turin sorkar lamah pawh an lo bei ve tawh ṭhin tih an sawi bawk. Lirthei kang tel ṭhin chungchangah  ngun taka ngaihtuah turin Hachhek Bial Kuhva Chingtu Pawl chu an ngen a. Custom lama hremna an tawrh nasat ṭhin dan leh Motor Life Insurance a zira sum leh pai chawi dante an sawi a. "Dan lova Kuhva lo lut reng reng  tihtawp hmak hi kan duh ber a,  HBKCP hmalakna kan thlawp zel ang che u," tiin thuchhuah chuan a tarlang bawk.

HBKCP lam aiawhte chuan lirthei kang a lo awm leh ṭhin dan sawifiahin warning an pek tawh ngeite pawhin an kalpui leh ṭhin a, mipui lamin inrunluihna leh ingaihnepna ang hialah an ngaih tawng avangin hruaitute dinhmun aṭang chuan a luhai thlak a, mipui thinurna a nep tawh loh thu an sawi bawk.

An thuchhuahin a tarlan danin MTDOA leh MTDA zingah Kuhva ro phur duh miah lo hi an tam a, tuna la phur reng hi chu mi 20/1 bak an nih loh thu sawiin, "Dan phal loh kuhva phurh hian lirthei neitu leh khalhtute rilru a ti chhia a, sum hmuh thut theihna hian min ti thatchhe zo tawh a. Hnamdang an hlawk ber a, tawp se kan duh a ni" an ti.