Aizawl: April 11, 2019-a Mizoram Lok Sabha MP thlan lo awm tura candidate zingah MNF Party candidate C.Lalrosanga a hausa ber a, a hausakna belhkhawm hi Rs. 6,87,39,036 a ni. MLA candidate zingah MNF candidate Zothantluanga a hausa ber bawk.
MP candidate ten affidavit an thehluh atanga a lan danin MNF candidate C.Lalrosanga hian sum fai Rs. 5,00,000 kawlin heng bakah hian Bank, lirthei leh thildang (moveable assets) a neih belhkhawm chu Rs. 37,39,036.31 a ni a. Hei bakah hian in hmun a neih immoveable assets hlut zawng chu Rs. 6,50,00,000 nia chhut a ni bawk. C.Lalrosanga hian loan ba a nei lo nia tarlan a ni.
Congress leh ZPM ten an thlawp ‘Mipui candidate’ Lalnghinglova Hmar hian sum fai Rs. 40,000 neiin Bank, lirthei leh thil danga a sum neih belhkhawm chu Rs. 65,93,253.52 a ni a, immoveable assets a nei lo nia tarlan niin loan ba a nei lo niin affidavit-ah tarlan a ni. Independent candidate, Mizo Democracy Warrior ten an thlawp Lalhriatrenga Chhangte chuan pawisa fai Rs. 2,50,000 neiin moveable assets a neih hlutzawng chu Rs. 9,93,000 a ni a, inmoveable assets Rs. 54,50,000 a nei a, SBI Kulikawn leh UCO bank-ah te leiba a nei a ni.
BJP candidate Nirupam Chakma hian Rs. 4,50,000 pawisa fai neiin Bank leh thil danga a sum neih belhkhawm chu Rs. 12,21,000 a ni a, immoveable assets Rs. 54,50,000 a nei bawk a. SBI bakah MLA loan ba a nei a ni.
PRISM candidate TBC Lalvenchhunga hian pawisa fai Rs. 15,000 neiin Bank leh thildang a neih hlutzawng chu Rs. 31,12,568.69 a ni a, in hmun a nei lo a, IDBI leh PNB-ah te loan ba a nei a ni.
Independent candidate leh tun MP inthlana hmeichhe awmchhun, Lalthlamuani hian sumfai Rs. 25,000 neiin bank leh lirthei nen a sum neih belhkhawm Rs. 43,54,55.10 a ni a, immoveable assets Rs. 40,00,000 hu neiin SBI-ah loan ba a nei niin affidavit-ah a tarlang bawk.
MP ruala Aizawl West I MLA by election lo awm tura candidate 3 zingah MNF candidate Zothantluanga a hausa ber a. Zothantluanga hian pawisa fai kawl lai Rs. 2,00,000 neiin bank leh thildang nena a sum neih belhkhawm chu Rs. 41,92,661 a ni a, hei bakah hian in hmun (moveable asset) Rs. 2,33,42,500 a nei bawk.
Congress leh ZPM ten an thlawp, Independent candidate Lalbuanga Sailo chuan pawisa fai kawl Rs. 50,000 neiin bank leh thil dang (lirthei) a neih belhkhawm nen Rs. 79,35,000 bakah immoveable asset Rs. 16,00,000 a nei a. Zoramthar candidate Rev. Zaichhawna Hlondo chuan pawisa fai kawl (cash in hand) Rs. 2800 neiin bank etc nen Rs. 33,62,800 neiin immoveable asset Rs. 24,34,000 a nei niin affidavit-ah tarlan a ni bawk.