Aizawl:Lok Sabha inthlan tura independent candidate Lalnghinglova Hmar chuan, Hnahthial-in district thar a nei ta chu a lawmpui thu a sawi a, chutih rualin district thar neih leh Lok Sabha inthlan awm tur chu thil inzawm lo a nih thu a sawi.
Nimin Inrinni zinga Hnahthial Bazara public meeting-a thu a sawinaah Congress leh ZPM-in an thlawp mipui candidate chuan, “Hnahthial hian hun rei tak district thar in ngen a, district puitling in lo ni dâwn ta a, ka lawmpui takzet a che u. Chutihlaiin MP inthlan lo awm turah ‘District thar lawmthu sawina’ tia in vote an dil hi chu thil inhmeh lo tak a ni. Sorkar thar siam turin in vote tling tawh a, MLA inthlana in vote tlinten lawmthu sawina atan district puitling an pe zawk dawn che u a, Lok Sabha inthlana ‘lawmthu sawi vote’ an dil lét hi chu thil mak tak a ni,” tiin a sawi.
India ram inthlan tur thlirin Lalnghinglova Hmar chuan, "Lok Sabha inthlan hi India roreltu thlanna a ni. BJP-NDA lam tang leh anni lo lam tang inelna a ni ta ber. Vanduaithlak takin MNF hi NDA ah an tel miau si a, MNF candidate kan vote chuan a tawpa BJP sawrkar tir tumna tho a ni. NDA paih kan duh a, Modi hi PM tawh lo se kan ti a, chumi mila vote thlak turin ka ngen che u a ni," a ti.
Lok Sabha inthlanah BJP-NDA lam lo tling leh palh se kan duh loh rawn CAB mai bakah a aia hlauhawm thei Uniform Civil Code pawh an la kalpui mai a hlauhawm thu a sawi a, Kristian tán a him lo tih sawi chhunzawmin, "December 25, Krismas ni taka Good Governance Day hmang lui duhtu, Good Friday ni taka Digital India Day min puan hnan duhtu chu Modi kaihhruai NDA an ni. Mizo Kristian zawng zawng ?an rual hun a ni a, keini hi BJP-NDA ni lo lama pen chhuak kan ni, " a ti a, CAB dotu mai ni lo CAB kalpui tumtu BJP-NDA pawh thawhpui duh lotu an nih thu a sawi. MP-a a tlina a hnathawh turte sawiin, "Kuthnathawktute tána rotling tur thil (asset) hnutchhiah ngei kan tum dawn," a ti a, thalaite eizawnna ngaih pawimawh a nih tur thu a sawi bakah ram dangte nena insumdawn tawnna tura hmachhawp awmte chak taka bawhzui a tum thu a sawi a, chhim lam mite tana Mizoram University Southern Campus tur nawr mek pawh theihna sang bera bawhzui a tum tur thu a sawi bawk.