Aizawl April 5, 2024 : Vawiin khan BJP MP Official Candidate Vanlalhmuaka, BJP Mizoram State President chuan Lunglei BJP Office ah Dr. K.Beichhua MLA nen Press Conference an nei a, MP-a thlantlin a nih chuan kum khat chhungin Lunglei-a MZU Southern Campus chu a function nghal tur thu a sawi.

Vanlalhmuaka chuan Lunglei Press mite kawmin, "Lunglei Khawpui hian MP-a min thlang tling a nih chuan vawiin thlenga la function lo, Lunglei-ah MZU Southern Campus hi kum khat chhungin a fuction nghal ang. Tin, Lunglei khawpui hi 'Mizoram-a khawpui mawi ber' a ni ang," a ti.

BJP MP Official Candidate, "Central-ah hian BJP-in Sawrkarna a siam leh ngei dawn a. 'Lei hi beng ila, kan ben ṭhelh lo ang' chutianga chiang chuan BJP hian Central-ah Sawrkarna kan siam ngei dawn a ni tih a chiang a ni," a ti bawk.

BJP Mizoram State President chuan, "Mizoram Mipui hian MP atan min thlang tling a nih chuan, Central Minister ka ni ngei dawn a, Mizoram mipuite hian Central Minister atan Mizo Kristian pa ngei neih kan duh a, State dang te awt lova Mizoramin Development a taka kan hmuh theih nan min vote theuh turin ka ngen che u a ni. Union Minister nih theihna dinhmuna ka din theih chhan hi Delhi-a kan hotute'n a min duhsak vang a ni," a ti a.

Dr. K. Beichhua MLA pawhin thu sawiin, "Mizoram Kristian te hi inenfiah chu kan ngaiin a lang a, BJP pawh hlau, Hindu pawh hlau, heng ho hlauh ngah lutuk Kristiante hnena Chanchintha hrilh hi kan tih tur a ni," a ti ve bawk.