Aizawl December 24, 2022: New Delhi Constitution Club-ah December 22 khan Lok Sabha leh Rajya Sabha member-te tan Christmas Lawmna Parliamentarians' National Christmas Celebrations programme hman a ni a. State hrang hrang aṭanga  Sakhaw hrang hrang bia MP-te an tel a, he hun hi Mizoram MP C. Lalrosanga chuan a kaihruai. 

He hun Kaihruaitu Mizoram Lok Sabha member C Lalrosanga chuan Bible atangin Lal Isua pianna chanchin hrilhlawk a nih dan te leh Remna Lal a nih dan te a sawi a. Khawvelin a mamawh em em remna leh muanna dik tak chu Isua  hian a rawn keng a ni, a ti. 

He Christmas programme- ah hian Meghalaya atanga MP (Lok Sabha) Agatha Sangma leh Nagaland Rajya Sabha MP Phangnon Konyak-i ten Bible a Lal Isua lo pian dan chanchin an chhiarchhuak a. Manipur Lok Sabha member Dr Lorho Pfoze-a'n ram hruaitute leh mipute tana ṭawngtaina a hmang bawk. 

Christian MP ten an buatsaih he programme Organising Chairman Pu Francisco Sardinha, Goa Lok Sabha MP-in duhsakna thu a sawi bakah Madhya Pradesh, Tamil Nadu, Jammu & Kashmir, Kerala leh state dang atanga MP te leh sakhaw rawngbawltuten thu an sawi. Delhi a kohhran hrang hrang zaipawlten hla an rem bawk a ni.