Aizawl : K. Vanlalvena, Rajya Sabha MP chuan January 22, 2021 khan Tlabung leh a chheh vela BSF Border 60 Battalion Out Post hrang hrang Tlabung Out Post, Khojoisuri Out Post, 199 Batallion Out-Post leh BSF Speed Board hmangin 22nd Tablabagh Border Out Post -te a tlawh a. International Boundary ‘Kawrpuichhuah’ leh Tepreghat Border Fencing, Gate no.1 to 3-te a tlawh nghal bawk.

K.Vanlalvena chuan, BSF, Assam Riffles leh BRTF-te hi tlang mite thian in nih angin, in awmna hmun apiangah tualchhung mite nen in harsatnaah inpuitawnin, inthian thatna tha tak in nei tur a ni, a ti a, MP a nih hnuah ramri chungchang hi ka ngaih pawimawh hmasak ber a ni thu a sawi a, ramri hmun hrang hrang a tlawh hnuah Bangladesh nena kan ramri hi a tlawh leh nghal thu a sawi.

Chakma foreigner, dan lova lut leh chhuakte an awm em tih fiah tur leh helai ramri vela mipui harsatna hrang hrangte enfel tura kal a nih thu a sawi rualin phalna nei lova Mizorama ramdang mi luh chu MNF Party chuan kan remti loh thu leh hma an lak zel tur thu a sawi. Foreigner lo lut thinte hian khua leh tui dik takte chanvo nasa takin min chhuhsak thin a, kan lo dang tlat tur a ni, a ti.

Parliament Session lo awm turah helai ramri vela harsatna an neihte a tul anga auchhuahpui a tum thu te, K. Vena chuan a sawi a, an mamawh leh an harsatnate chu a hnenah thlen thin tura inhrilh chian ngai a ti thu leh, amah ngei pawhin dan lova Bangladesh atanga foreigner lo lut thinte a lo ngaih pawimawh avangin MZP a nih hun laia Long March an neih hial thu leh, a vei em em thin thu a sawi.

Ramri hungna chu ramri atanga metre 150 laia hla a siam a nih avangin a pawn lama awm khawtual mite himna chu ngai pawimawh turin a ti a, ram chân zawnga fencing siam tha a tih loh thu leh central ministry-ah pawh thlen a nih tur thu a sawi bawk.